«Dasaran.am» կրթական ծրագիրը Հայաստանի Հանրապետության վարչապետի հովանավորությամբ, ՀՀ կրթության և գիտության նախարարության, Երևանի քաղաքապետարանի, «Փյունիկ» բարեգործական հիմնադրամի, «Նոր սերնդի դպրոց» հասարակական կազմակերպության հետ համատեղ և «Նուռ քարտ» կուտակային ծրագրի աջակցությամբ 2013թ. նոյեմբերի 1 – ից ս.թ. մայիսի 23-ը իրականացրել է «Նոր սերնդի դպրոց 2014» մրցույթը, որի ամփոփումն ու հանդիսավոր մրցանակաբաշխության արարողությունը տեղի ունեցավ ս.թ. հունիսի 13-ին:
Միջոցառման պատվավոր հյուրերի թվում էր ՀՀ կրթության և գիտության նախարար Արմեն Աշոտյանը, ինչպես նաև Երևանի քաղաքապետարանի հանրակրթության վարչության պետ Գայանե Սողոմոնյանը և 65 դպրոցների տնօրեններ:
Նախարարն իր ողջույնի խոսքը հղեց միջոցառման մասնակիցներին` շնորհավորելով մրցույթի հաղթողներին:
Կարդացեք նաև
Մրցանակաբաշխության արարողության բացման խոսք ասաց նաև «Dasaran.am» կրթական ծրագրի հիմնադիր նախագահ Սուրեն Ալոյանը, ով հյուրերին ներկայացրեց վերջին մեկ տարվա ընթացքում «Dasaran.am» կրթական ծրագրի կողմից իրականացրած աշխատանքների ցանկն ու ոլորտները, հավելելով, որ վերոնշյալ մրցույթը կկրի շարունակական բնույթ՝ նպաստելով դպրոցներում տեղեկատվական տեխնոլոգիաների կիրառման գործընթացին:
Նոր սերնդի դպրոց 2013-2014» մրցույթին մասնակցել են «Dasaran.am» կրթական ծրագրին միացած բոլոր 1363 դպրոցները, որոնցից հաղթող են ճանաչվել այն դպրոցները, որոնց ուսուցչական անձնակազմն ամենաարդյունավետն է վարում էլեկտրոնային մատյանը` ժամանակին կատարելով գնահատականների, տնային հանձնարարությունների և բացակայությունների մուտքագրումները:
Մրցույթում առաջին 65 հորիզոնականները զբաղեցրած դպրոցները Հայաստանի Հանրապետության Վարչապետի, Կրթության և գիտության նախարարության, Երևանի քաղաքապետարանի, «Փյունիկ» բարեգործական հիմնադրամի, «Dasaran.am» կրթական ծրագրի և «Նոր սերնդի դպրոց» հասարակական կազմակերպության կողմից ստացան բազմաթիվ մրցանակներ, այդ թվում` համակարգիչներ, գրադարաններ, խրախուսական նվերներ և պատվոգրեր:
Մրցույթի գլխավոր մրցանակին՝ համակարգչին, արժանացան հետևյալ 7 դպրոցները.
1. գ. Նորաբակի միջնակարգ դպրոց,
2. գ. Արտամետի միջնակարգ դպրոց,
3. ք. Վայքի վարժարան,
4. գ. Լեռնամերձի հիմնական դպրոց,
5. գ. Հայրավանքի միջնակարգ դպրոց,
6. ք. Թումանյանի միջնակարգ դպրոց,
7. գ. Զորավանի միջնակարգ դպրոց
Նշենք, որ մրցույթի առաքելությունն է բարձրացնել ՀՀ դպրոցներում ուսուցչական անձնակազմի համակարգչային գիտելիքների մակարդակը, խթանել դպրոցներում տեղեկատվական տեխնոլոգիաների ակտիվ օգտագործումը, խրախուսել դպրոցներում «Dasaran.am» կրթական ծրագրի կողմից տրամադրված էլեկտրոնային միջավայրի լիարժեք կիրառումն, իսկ ծնողների համար ապահովել աշակերտների առաջադիմության վերաբերյալ տեղեկատվության հասանելիությունն ու թափանցիկությունը:
«Dasaran.am»
