Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մեսրոպ Մակյանը նախորդ դատական նիստի ժամանակ ինքնավնասման դիմած Դավիթ Գալստյանին հարցրեց, թե ինչպես է նրա զգացողությունը, ինչին ամբաստանյալը պատասխանեց, որ լավ է: Դատավորը, մինչ կհրապարակեր նախորդ դատական նիստին ինքնավնասման դիմած Դավիթ Գալստյանի նախաքննության ժամանակ տված ցուցմունքները, հայտնեց, որ նախորդ նիստին դրանք չեն հրապարակվել, քանի որ «վատացել էր Դավիթ Գալստյանի ինքնազգացողությունը»:
Հրապարակվեց 25.05.2011թ. եւ 30.07.2012թ. Դավիթ Գալստյանի նախաքննական ցուցմունքները, որի ժամանակ նա մի դեպքում հանրային պաշտպան է ցանկացել ունենալ, իրեն մեղավոր է ճանաչել լիովին, սակայն, Արտուշ Հակոբյանի համար ասել էր, որ նրա հետ «ռազբոյ» չի արել, իսկ Սամվելն էլ նախկին թաղապետի «ռազբոյի» ժամանակ չի եղել:
Կարդացեք նաև
Դավիթ Գալստյանի պաշտպան Ստեփան Ոսկանյանը միջնորդեց, որպեսզի հրապարակվի Հատուկ քննչական ծառայությունում իր պաշտպանյալին խոշտանգումների ենթարկելու վերաբերյալ ցուցմունքը:
Սակայն թե մեղադրող Սասուն Խաչատրյանը, թե դատարանը հայտնեցին, որ այն սույն գործով մեղադրանքի սահմաններից դուրս է եւ մերժվեց: Դավիթ Գալստյանը կիսաշշուկով ասաց՝ ձեռ չէր տալի՞ս: Նա հրաժարվեց պատասխանել մեղադրողի հարցերին, իսկ երբ մեղադրողը այնուամենայնիվ հնչեցրեց իր հարցերը, մասնավորապես՝ «եթե ձեր նկատմամբ կիրառվել է բռնություն, ինչպե՞ս է, որ Արտուշ Հակոբյանի եւ Սամվելի մասնակցության մասով դիրքորոշում եք արտահայտել», Դավիթ Գալստյանը չդիմացավ եւ ասաց՝ «Բաբաքեխյանը կգա՝ կպատասխանի»:
Դատարանն անցավ «բանդայի պարագլուխ» Արտուշ Հակոբյանի ցուցմունքներին: Նա հանդես եկավ հայտարարությամբ, որի ժամանակ հայտնեց, որ ամբաստանյալներին ճանաչում է դատարանից, իր ընկերն է եղել հանգուցյալ Արման Դալլաքյանը:
Նա ասաց, որ այս գործը սարքվել է նախկին ոստիկանապետ Ալիկ Սարգսյանի օրոք եւ որ նախկին ոստիկանապետի մորաքույրը իր հորեղբոր կինն է եղել: Իսկ թե ինչու է «բարեկամությունը» վերածվել թշնամանքի՝ քիչ հետո՝ տեսանյութում:
Ռուզան ՄԻՆԱՍՅԱՆ
