«Էնտերովիրուսային վարակները նոր բան չեն, միշտ եղել են»,- այսօր՝ օգոստոսի 7-ին, «Արմատ» մամլո ակումբում լրագրողների հետ հանդիպման ընթացքում հայտարարեց ՀՀ առողջապահության նախարարության Իմունականխարգելման ազգային ծրագրի ղեկավար Գայանե Սահակյանը:
Նրա խոսքերով` էնտերովիրուսային վարակը միակ վարակն է, որ մարդու մոտ կարող է առաջացնել առողջ վիրուսակրություն, 5-6 ամիս կարող է գտնվել մարդու մոտ, բայց նրա մոտ կլինիկական որեւէ ախտանիշ չարձանագրվի, սակայն այն վարակ կարող է արտազատել եւ տարածել շրջապատում: Վարակի մեկ այլ առանձնահատկությունն էլ այն է, որ հիվանդ մարդն ու առողջ վիրուսակիրը վարակը կարող են տարածել, եւ առողջ մարդու մոտ վարակը կարող է անցնել ցանկացած ճանապարհով.
«Սա եւս դժվարություններ է առաջացնում պայքարի միջոցառումները կազմակերպելու առումով, որովհետեւ մենք չգիտենք տվյալ պահին վարակման ո՞ր մեխանիզմի հետ գործ ունենք. Բերանի միջոցո՞վ է փոխանցվում, կեղտոտ ձեռքերի՞, ջրային, սննդային ճանապարհներո՞վ, թե՞ գործ ունենք օդակաթիլային մեխանիզմի հետ»:
Գայանե Սահակյանի խոսքերով` էնտերովիրուսը բավականին կայուն է, կարող է մի քանի ամիս ապրել շրջակա միջավայրում` ջրերում, ջրամբարներում եւ վարակել մարդկանց:
Կարդացեք նաև
2014 թվականին, ըստ նրա, ամբողջ աշխարհում էնտերովիրուսային վարակների աշխուժացում է գրանցվել, բավականին լուրջ իրավիճակ է ստեղծվել Ղազախստանում: Իսկ Հայաստանում, տիկին Սահակյանի խոսքերով, հուլիսի առաջին շաբաթների ընթացքում նկատվել է վարակի աշխուժացում, հետագայում դեպքերի գրանցումը հաճախակի է դարձել եւ օրական հոսպտալացվել է 15-19 հիվանդ: Գրանցված դեպքերի 85 տոկոսում հիվանդները երեխաներ 5-9 տարեկան երեխաներ են.
«Այսօր արդեն նկատվում է նվազման որոշակի միտում. Գրանցվում է օրական 7-9 հոսպիտալացում, դեպքերն այդքան լուրջ դեպքեր չեն: Կլինիկական դրսեւորումը սկսվում է բարձր ջերմությամբ, սրտխառնոցով, փսխումով, որոշ երեխաներ գանգատվում են նաեւ պարանոցի շրջանում մկանային ցավից»:
Ամի ՉԻՉԱԿՅԱՆ
