«Եվրոպան պատրաստ է փոխգործակցել Հայաստանի հետ: Ռուսաստանի հետ հարաբերությունները կարևոր են, սակայն կարևոր է նաեւ Եվրոպայի հետ կապերի ընդլայնումը»,-այսօր ՀՀ ԱԳ նախարարությունում ՀՀ ԱԳ նախարար Էդվարդ Նալբանդյանի հետ համատեղ ասուլիսին հայտարարեց Ավստրիայի ԱԳ նախարար Սեբաստիան Կուրցը: Նա շեշտեց, թե տնտեսական կապերի ընդլայնման մեծ հանրավորություններ կան: Էդվարդ Նալբադյանն էլ կարևորեց այն հանգամանքը, որ ավստրիացի նախարարի պատվիրակության կազմում, մասնավորապես, էներգետիկայի ոլորտը ներկայացնող գործարարների մեծ խումբ կա:
Պատասխանելով Ուկրաինայում հրադադարի ռեժիմի հաստատման մասին հարցին՝ ՀՀ ԱԳ նախարար Էդվարդ Նալբանդյանն ասաց. «Ողջունում ենք կրակի դադարեցման մասին պայմանավորվածությունները եւ հույս ունենք, որ դրանք կյանքի կկոչվեն: Դա բանակցային սեղանի շուրջ լուծումների որոնման համար ճանապարհ կբացի՝ ուղղված երկարատեւ խաղաղության ձեռքբերմանը»:
Ինչպես արդեն տեղեկացրել ենք, անդրադառնալով ՆԱՏՕ-ի գագաթնաժողովում ընդունված հռչակագրին, Էդվարդ Նալբանդյանը նշել էր, որ ՆԱՏՕ-ն ընտրողական մոտեցում ցուցաբերեց միջազգային իրավունքի հանդեպ:
Հայ լրագրողներից մեկին հետաքրքրեց՝ Ադրբեջանը ԵԽ նախագահող երկիր է, բայց այնտեղ մարդու իրավունքների ոտնահարումները տարերային բնույթ են կրում, դա ԵԽԽՎ-ի վարկանիշի վրա չի՞ազդում, ինչպե՞ս կարելի է դա կանխել: Սեբաստիան Կուրցը պատասխանեց. «Ադրբեջանը պարզապես այբբենական հերթականությամբ է ընտրվել ԵԽ-ում նախագահող երկիր: Մենք մտահոգված ենք Ադրբեջանում մարդու իրավունքների պաշտպանության առումով տիրող իրավիճակով եւ մեր հնարավոր բոլոր միջոցներով խթանելու ենք այդ խնդիրների լուծմանը: Մի քանի օրից այցելելու եմ Ադրբեջան եւ տեղում կօգտագործեմ իմ հնարավորությունները այնտեղ քննարկելու մարդու իրավունքների, հատկապես՝ քաղբանտարկյալների իրավիճակը, եւ մենք մեր քննադատական վերաբերմունքը կարտահայտենք այդ իրավիճակի վերաբերյալ»:
Կարդացեք նաև
Տաթև ՀԱՐՈՒԹՅՈՒՆՅԱՆ
