Այսօր Նիկոլ Փաշինյանի հեղինակած «Սահմանապահ համայնքների մասին» օրենքի նախագիծը քվեարկության դրվեց օրակարգ մտնելու համար եւ մերժվեց:
Մինչ քվեարկությունը, Նիկոլ Փաշինյանը հիշեցրեց պատգամավորներին, որ օրենքով նախատեսվում է, որ սահմանամերձ մի շարք համայնքների բնակիչների սպառած էլեկտրաէներգիայի, գազի, խմելու եւ ոռոգման ջրի վարձավճարի 50 տոկոսը պետք է վճարի պետությունը, նախատեսվում է երիտասարդ ընտանիքներին աջակցություն, առողջապահական անվճար ծառայություններ եւ այլ արտոնություններ:
Նիկոլ Փաշինյանը տեղեկացրեց, որ հանձնաժողովում այդ նախագիծը դրական եզրակացության չի արժանացել: Պարոն Փաշինյանը մասնավորեցրեց, որ խոսքը ՀՀԿ եւ ԲՀԿ խմբակցության անդամների մասին է. «ԲՀԿ-ի պատճառաբանությունն այն է, որ պետք է ոչ թե առանձին օրենքով դա արվի, այլ պետք է այլ օրենքներում փոփոխություններ մտցնեն: Ես այս փաստարկին նույնիսկ չեմ անդրադառնալ, որովհետեւ ես փաստաթղթում նշել եմ, որ այլ օրենքներում փոփոխություններ կատարելու անհրաժեշտություն չի առաջանում այս նախագծով: Ինչ վերաբերում է ՀՀԿ-ի փաստարկներին, նրանք նշում են, որ կառավարությունն ավելի համապարփակ նախագիծ է ներկայացնում: Ինքս մասնակցել եմ վարչապետի որոշմամբ ստեղծված աշխատանքային խմբի նիստին, որտեղ նախատեսվում էր սահմանամերձ համայնքների հարցերը քննարկել, եւ կարող եմ հաստատել, որ սրան համարժեք նախագիծ ստեղծելու հարց առայժմ կառավարության օրակարգում չկա: Կառավարությունը նախատեսում է որոշակի արտոնություններ տալ ինստիտուտներին՝ համայնքներ, ձեռնարկատիրական գործունեությամբ զբաղվող անհատ ձեռներեցներ, ՍՊԸ-ներ, իսկ մեր օրենքով նախատեսվում է արտոնություն տալ ուղիղ այն մարդկանց, ովքեր հիմա ապրում են սահմանապահ համայնքներում»:
ԲՀԿ խմբակցության պատգամավոր Ստեփան Մարգարյանը վստահեցրեց, որ իրենք դեմ չեն քվեարկել հանձնաժողովում, այլ՝ ձեռնպահ:
Կարդացեք նաև
Ըստ Նիկոլ Փաշինյանի, սահմանապահ համայնքների բնակիչները պետք է զգան, թե ինչ փոխվեց ամառային իրենց այցելությունից հետո:
Գալուստ Սահակյանը վստահեցրեց, որ 6 խմբակցություններ դիմել են նույն հարցով կառավարությանը, եւ նրանց առաջարկները հաշվի առնելով՝ նախագիծն ավելի համապարփակ կլինի: Նա հորդորեց, որ աշխատելիս միասին աշխատեն ու համաձայնեցնեն իրար հետ: Նիկոլ Փաշինյանը պատասխանեց, որ հանձնաժողովում էլ պարտավորվել էր, որ եթե իր ներկայացրած նախագիծը մտնի ԱԺ օրակարգ, անձամբ կմոտենա խմբակցություններին եւ որպես համահեղինակ կմիանան նախագծին՝ իրենց առաջարկություններով 2-ական պատգամավոր:
«Ժառանգության» պատգամավոր Զարուհի Փոստանջյանի խոսքերով էլ՝ օրերս է Տավուշում եղել եւ նման օրենքի նախագիծ այսօր շատ հրատապ է, եւ իրավունք չունեն սպասելու կառավարությանը:
Հեղինե Բիշարյանը հորդորեց աջակցել խորհրդարանի պատգամավորին՝ Փաշինյանին եւ «մոդայիկ չդարձնել, որ պետք է պատգամավորների նախագծերը մերժել, սպասել կառավարությանը, որը պիտի նմանատիպ մի բան բերի»:
Նիկոլ Փաշինյանի ներկայացրած նախագիծը դրվեց քվեարկության. Կողմ քվեարկեց 40, դեմ՝3, ձեռնպահ՝ 50 պատգամավոր:
Հռիփսիմե ՋԵԲԵՋՅԱՆ
