Այսօր Աշոցքի շրջանի հեռավոր Թավշուտ գյուղը տոնում էր իր հիմնադրման 90-ամյակը և նշում էր Հայոց ցեղասպանության 100-ամյակը: Այս գյուղում բացառապես բնակվում են ցեղասպանությունից մազապուրծ փրկված հայերի ժառանգները, որոնք մեզ հետ զրույցում արտառոց պատմություններ էին ներկայացնում գաղթի ճամփան բռնած ապուպապերից:
Տոնը վերածվեց հայրենասիրական միջոցառման: Ինչպես ներկայացրեց գյուղապետ , դաշնակցական Սուրեն Սարգսյանը, Թավշուտ գյուղը ծնվել է ցեղասպանության արդյունքում, այն հիմնադրվել է 1924 թվականին, և այստեղ տեղաբնակներ չկան:
Թավշուտցիները նախ վեր բարձրացրեցին բոլոր այն երկրների դրոշները, որոնք ընդունել են Հայոց ցեղասպանությունը:Այս ամենը կատարվեց բարձրաձայն, գյուղովի շնորհակալություն գոչելով ու տարբեր երկրների կողմից Հայոց ցեղասպանության ընդունման մասին պատմական տեղեկություններ հաղորդելով:
Տոնը նշվեց ազգային երգ ու պարով, ազգային կերակրատեսակներով. սեղանները բացառապես պատրաստվել էին թավշուտցիների պատրաստած ուտեստներով: Առաջին անգամ հնչեց նաև Թավշուտի հիմնը, որի երաժշտության հեղինակը թառահար Արտեմ Խաչատուրն է, ծնունդով թավշուտցի: Այն կատարեց երգիչ Արսեն Գրիգորյանը:
Թավշուտցիները ամբողջ միջոցառման ընթացքում ցույց տվեցին, որ իրենք պահանջատեր են թուրքերից: Նշենք, որ այս տոնին Շիրակի մարզպետ Ֆելիքս Ցոլակյանից բացի, մասնակցելու էին եկել մարզի բոլոր դաշնակցականները:
Կարդացեք նաև
Դաշնակցական գյուղապետ Սուրեն Սարգսյանը ևս խրոխտ ձայնով հայրենասիրական երգեր էր երգում. նշում, որ վերջ առաջ գնալու են իրենց «էՐԳԻՐ», այնտեղ, որտեղից եկել են: Եվ մինչ թավշուտցիները սասնա պարն էին պարում, գյուղի տոնակատարությանը անսպասելիորեն հայտնվեց նաև կապի ու տրանսպորտի նախարար Գագիկ Բեգլարյանը: Թավշուտցիները թեև հյուրընկալ մարդիկ են, սակայն բավական զարմացան նախարարի անսպասելի այցից: Պարզվեց, որ վերջինս եկել էր Ամասիայի ՝ վերջերս ասֆալտապատած ճանապարհներից մեկը տեսնելու: Նախարարը երկար չմնաց տոնակատարությանը, շնորհավորելով գյուղացիներին՝ մարզպետի հետ աննկատ հեռացավ:
Աշոցքի գյուղապետերից շատերը, որոնք ակնկալում էին նախարարից իմանալ, թե ի վերջո որ հատվածում է կառուցվելու Հյուսիս-հարավ մայրուղին կամ երբ է վերանորոգվելու Բավրայի մաքսակետ տանող խարխուլ ճանապարհահատվածը, այդպես էլ չկարողացան նրան հարցեր տալ: Վերջիններս, մի պահ տեսնելով սեղանի մոտ կանգնած Գագիկ Բեգլարյանին ու կորցնելով տեսադաշտից, մեկը մյուսին հարցնում էին՝ բա ուր գնաց նախարարը:
Թավշուտցիների՝ ցեղասպանության մասին հիշողություններին կանդրադառնանք մեր հետագա ռեպորտաժներում:
Նունե ԱՐԵՎՇԱՏՅԱՆ
Նունե ջան, որտեղի՞ց է հեռու Թավշուտը, որ գրում ես հեռավոր: Բավրայից կամ Զույգաղբյուրից հո հեռու չէ՞: Այ հենց դադարենք Հայաստանի բնակավայրերին հեռու ու մոտիկ դիտարկելը ու դրանք ընկալենք որպես Հայաստան, այ այդ ժամանակ էլ շատ խնդիրներից ազատված կլինենք: Երեւանում էլ, Չարբախն ինձ համար հեռավոր է, իսկ Քանաքեռը՝ ոչ: Մեկ ուրիշի համար էլ՝ հակառակը: Իսկ իրականում անհեթեթություն է Չարբախը կամ Քանաքեռը անվանել հեռավոր՝ ճիշտ այնպես, ինչպես Թավշուտը:
Հիմնադրման 90ամյակը տոնելը հասկացանք, բայց եղեռնի 100ամյակը տոնելը չհասկացանք Փաստորեն ,,հեռավոր,, Թավշուտում եղեռնը տոն է:
Ըստ լրագրողի գրածի լավ ուրախ է անցել:
Շնորհակալություն դիտողության համար, ուղղեցինք:
Ի՞նչն եք ուղղել:
Pastor (Der hayr ) with medals,so funny