«Նախ հրավեր չենք ստացել և անկոչ հյուր չենք»,-այսօր «Պոստ սկրիպտում» մամուլի ակումբում լրագրողների հետ հանդիպմանը ԱԺ ՕԵԿ խմբակցության քարտուղար Մհեր Շահգելդյանը հայտարարեց, թե չի մասնակցելու հոկտեմբերի 10-ին ոչ իշխանական եռյակի նախաձեռնած հանրահավաքին:
Փոխարենը պարոն Շահգելդյանն ասաց, թե իրենք էլ են հանրահավաքներ կազմակերպում և ըմբռնումով են մոտենում եռյակի հանրահավաքին ու մանրամասնեց. «Հանրահավաքին նայում ենք որպես քաղաքական ակտիվության նշան: Իսկ համագործակցության դաշտ եղել է և կա, օրինակ, այնպիսի կարևորագույն խնդրում, ինչպիսին հարյուր տոկոսանոց ընտրական համակարգի անցնելու հարցն է: Սա երեք ուժերի նախաձեռնած հանրահավաքն է, սա իրենց օրակարգն է»:
Իշխանափոխության պահանջի մասին պարոն Շահգելդյանն ասաց. «Համակարգային փոփոխություններ պիտի լինեն և իշխանափոխությունը դրա մի մասն է: Դա կլինի արտահերթ ընտրություններով, թե հերթական ընտրությունների ժամանակ, այլ խնդիր է: Փոփոխությունների կարևորումը նաև ՕԵԿ-ի՝ կոալիցիայից դուրս գալու հիմնական պատճառներից մեկն էր»:
Հարցին՝ ձեր հանրահավաքներում կհնչե՞ն իշխանափոխության կոչեր, պարոն Շահգելդյանը խուսափեց հստակ պատասխանելուց. «Խնդիրը մենք դիտարկում ենք համակարգային փոփոխությունների և բարեփոխումների մեջ»:
Կարդացեք նաև
Տաթև ՀԱՐՈՒԹՅՈՒՆՅԱՆ
