«Անգամ այն դեպքերում, երբ մենք խոսում ենք հաշմանդամություն ունեցող անձանց մասին, մենք հաշմանդամություն ունեցողների մեջ նույնպես խտրականություն ենք մտցնում»,- այսօր` նոյեմբերի 11-ին, Հայաստանում խտրականության վերաբերյալ համաժողովի ընթացքում հայտարարեց «Life» ծրագրի տնօրեն Ջինա Սարգիսովան:
Նա նշեց, որ սովորաբար հաշմանդամ ասելիս մարդիկ պատկերացնում են հենաշարժողական խնդիրներ ունեցող հաշմանդամներին` բոլորովին մոռանալով հաշմանդամություն ունեցող այլ խմբերին, որոնք ունեն այլ կարիքներ:
Նրա խոսքերով` փաստերը ցույց են տալիս, որ հասարակության վերաբերմունքը հաշմանդամներին չի կարող դիտվել որպես դրական. «Մեր դրական վերաբերմունքը հիմնված է խղճահարության, կարեկցանքի զգացմունքների վրա, որոնք որ միանշանակորեն դրական զգացմունք չեն:
Խղճահարությունը չի ենթադրում, որ դու տվյալ անձին վերաբերում ես ինչպես քեզ հավասարին, դու իրեն արդեն իսկ դարձնում ես ավելի ցածր եւ խղճահարության զգացմունքը առաջնորդում է քեզ այդ գործում»:
Կարդացեք նաև
Ջինա Սարգիսովայի խոսքերով`«Life» ծրագրի շրջանակներում անցկացված հարցման արդյունքում պարզ է դարձել, որ հարցվածների 30 տոկոսը խղճահարությամբ եւ կարեկցանքով է վերաբերում հաշմանդամություն ունեցող անձանց, անտարբեր է` 20 տոկոսը, հարցվածների 5 տոկոսը խուսափողական վերաբերմունք ունի, հեգնական վերաբերմունք ունի` 4 տոկոսը, հարգալից վերաբերմունք ունի` 34.4 տոկոսը: Հարցմանը մասնակցել է 502 անձ Հայաստանի Հանրապետության քաղաքներից եւ 503 անձ գյուղերից.
«Անշուշտ, եթե մենք խղճահարությունը դիտեինք որպես դրական վերաբերմունք, մենք կխոսեինք դրական վերաբերմունքի մասին, բայց քանի որ խղճահարությունը միանշանակորեն խտրականության հիմք է, սա դիտվում է որպես բացասական վերաբերմունք, եւ ի զարմանս մեզ` մենք բացասական ենք վերաբերում հաշմանդամություն ունեցող անձանց»:
Ամի ՉԻՉԱԿՅԱՆ