Արմեն Մուրադյանի ամանորյա ուղերձը
Հարգելի բուժաշխատողներ, հայրենակիցներ
Շնորհավորում եմ Ամանորի և Սուրբ Ծննդյան տոների կապակցությամբ: Բուժաշխատողների ամենօրյա աշխատանքը փոքրիկ սխրանք է, առանց որի, առհասարակ, անհնար է պատկերացնել առողջապահության տարբեր ոլորտների զարգացումը:
Որքան էլ կարևոր լինեն ՀՀ առողջապահության նախարարության կողմից տարվող քաղաքականությունը, ոլորտի զարգացմանն ուղղված ռազմավարական քայլերը, առանց ձեր աջակցության, բարեխիղճ աշխատանքի ու հոգածության այդ ծրագրերը կյանքի չեն կոչվի:
Կարդացեք նաև
Առանց Ձեր մարդասիրական, տքնաջան աշխատանքի անհնար է պատկերացնել ոլորտի զարգացումը, համակարգի հանդեպ վստահության ձևավորումը:
Ցանկանում եմ, որ ամենօրյա աշխատանքում, չնայած դժվարություններին, չդադարեք զգալ ձեր առաքելության կարևորությունը:
Ձեր աշխատանքի լավագույն գրավականը մարդկանց երախտիքի խոսքն է: Միշտ բարձր պահենք բուժաշխատողի պատիվը: Գալիք տարում եղեք առողջ, հաջողակ և գնահատված:
Կցանկանայի առանձնահատուկ շնորհավորել այն բուժաշխատողներին, ովքեր Ամանորի գիշերը, դրան հաջորդող օրերին կլինեն հիվանդի կողքին, մտահոգ նրա առողջությամբ, ինչպես նաև նրանց, ովքեր տոնական օրերին կլինեն դիրքերում` զինվորի կողքին կամ հիվանդանոցներում:
Ամանորյա շնորհավորանքս եմ ուղղում նաև Հայաստանի և Սփյուռքի մեր գործընկերներին, հայրենակիցներին:
ՀՀ առողջապահության նախարար Արմեն Մուրադյան
