«ԱԺ պատգամավորները, անկախ նրանից՝ իշխանությունն են ներկայացնում, թե ընդդիմադիր են, արտաքին հարաբերությունների եւ օտարերկրյա գործընկերների հետ շփումների ընթացքում անառարկելիորեն միասնական են դառնում, երբ խոսքը վերաբերում է Ղարաբաղի հարցին: Սա մեր կարեւորագույն ձեռքբերումներից մեկն է: Ձեր նշած ադրբեջանական զինուժի ակտիվացման ֆոնին անթույլատրելի է ներքին կյանքում որեւէ տարընթերցում թույլ տալու հնարավորությունը: Կարծում եմ, հրեշավոր դեպք է տեղի ունեցել հունվարի 31-ին Բերձորում: Կարծում եմ, դա լրջագույն հարված է ԼՂՀ-ին, Արցախի պետականությանը»,- այսօր ԱԺ նիստում ՀԱԿ խմբակցության պատգամավոր Նիկոլ Փաշինյանն այսպես դիմեց ԱԺ նախագահ Գալուստ Սահակյանին:
Նա ասաց, որ այսօր հանրությունն այդ դեպքի հետ կապված պատասխանների է սպասում. «Չափազանցրած չենք լինի, եթե ասենք, որ հանրությունը շոկի մեջ է տեղի ունեցածից»:
Նա առաջարկություն արեց Գալուստ Սահակյանին՝ քննարկել ԱԺ պատգամավորների ներկայացուցչական պատվիրակություն ստեղծելու հարցը: Այդ պատվիրակությունը, ըստ Նիկոլ Փաշինյանի, պետք է անհապաղ մեկնի Ստեփանակերտ, Ղարաբաղի գործընկերների հետ քննարկի տեղի ունեցածը:
Գալուստ Սահակյանը պատասխանեց, որ այսօր կփորձի քննարկել այդ հարցն իր գործընկերոջ հետ՝ Ղարաբաղի ԱԺ նախագահի հետ. «Միջադեպի հարցով ԼՂՀ պատկան մարմինները զբաղվում են, կփորձեմ այդ ինֆորմացիան վերլուծությունների ենթարկեմ եւ կարձագանքեմ ձեր հայտարարությանը»:
Կարդացեք նաև
ԱԺ փոխխոսնակ Էդուարդ Շարմազանովը ընդհատել էր Նիկոլ Փաշինյանին եւ անջատել նրա խոսափողը՝ ասելով, որ օրակարգի վերաբերյալ պետք է հարցեր տան:
Նիկոլ Փաշինյանը կոչ արեց, որ Շարմազանովն ի չարս չօգտագործի իր լիազորությունները եւ թույլ տա, որ միտքն ավարտի:
Ավելի ուշ իր ելույթում Նիկոլ Փաշինյանն ասաց, որ Բերձորում բացասական վտանգներ է տեսնում ինչպես հայկական, այնպես էլ միջազգային տիրույթում: Ուստի պնդում է, որ խումբ կազմեն եւ մեկնեն Արցախ:
Հռիփսիմե ՋԵԲԵՋՅԱՆ