Ընդամենը 3 ամիս առաջ ՀՀ վարչապետ Հովիկ Աբրահամյանը ֆինանսների նախարար Գագիկ Խաչատրյանին հանձնարարեց տնտեսվարողների համար նպաստավոր պայմաններ ստեղծել, օրերով ու շաբաթներով լարվածության մեջ չպահել տնտեսվարողին եւ սահմանափակել յուրաքանչյուր օրացուցային տարում ՀՀ հարկային մարմինների կողմից օպերատիվ-հետախուզական միջոցառումները մեկ անգամով, մեկից ավելի անգամ ստուգումները վերապահելով միայն բացառիկ դեպքերում՝ խիստ ծանրակշիռ փաստարկների պարագայում:
Շաբաթ օրը` փետրվարի 14-ին, սակայն վարչապետ Հովիկ Աբրահամյանն իր որոշումը, մեղմ ասած, գետնովը տվեց` ֆիննախին հանձնարարելով Գագիկ Ծառուկյանին պատկանող հիմնարկներում լայնածավալ ստուգումներ սկսել:
Վարչապետի համար «խիստ ծանրակշիռ փաստարկ» էին ՀՀ նախագահ Սերժ Սարգսյանին հասած Գագիկ Ծառուկյանի` չմուծված եւ բարեգործական գործունեությամբ քողարկված հարկերի մասին լուրերը:
Aravot.am-ի հարցին, թե Գագիկ Ծառուկյանին պատկանող ո՞ր ընկերություններում են ստուգումներ սկսելու եւ արդյոք ստուգման համար հիմք է հանդիսացել միայն վարչապետի հանձնարարականը, ֆինանսների նախարարությունից հայտնեցին, որ այդ հարցերին առայժմ չեն կարող պատասխանել:
Կարդացեք նաև
ԲՀԿ առաջնորդ Գագիկ Ծառուկյանին եւ նրա ընտանիքին են պատկանում «Արարատցեմենտը», «Կոտայքի գարեջրի գործարանը», «Երեւանի Արարատ կոնյակի-գինու-օղու կոմբինատը», «Մուլտի Լեոնը», «Մուլտի գազը», «Օնիրա Քլաբ» ժամանցային կենտրոնը, Հայ-բելառուսական առեւտրի տունը, Մագաս Ինվեստը եւ եւս 7-8 ընկերություն:
Հիշեցնենք, քաղաքական գործիչ-գործարար Գագիկ Ծառուկյանի բիզնեսների նկատմամբ հարկայինի «հետաքրքրությունը» մեծացավ ՀՀ նախագահ Սերժ Սարգսյանի հայտնի ելույթից, հետո երբ ՀՀԿ խորհրդի նիստում նախագահը հրապարակավ կասկածներ էր հայտնեց Գագիկ Ծառուկյանի բիզնես գործունեության ընթացքում բարեգործության անվան տակ հարկեր քողարկելու մասին:
Լուսինե ԲՈՒԴԱՂՅԱՆ
