«Հայ-թուրքական արձանագրությունները հետ կանչելը տրամաբանական շարունակությունն է այն քաղաքականության, որն ասվեց ՄԱԿ-ի ամբիոնից: Սա արձանագրումն էր այն փաստի, որ ՀՀ-ն փորձեց իր կողմից կատարել բոլոր անհրաժեշտ քայլերը, որոնք կարող էին տանել հարաբերությունները նորմալացման: Գնդակը Թուրքիայի դաշտում էր եւ այդպես էլ պատասխան չեղավ: ՄԱԿ-ի ելույթից հետո արձանագրենք, որ տրամաբանական քայլ էր՝ այս քաղաքական կուրսի շրջանակներում»,- այսօր «Հայելի» ակումբում ասաց պատգամավոր Ալեքսանդր Արզումանյանը:
Հարցին՝ հնարավո՞ր է կապ ունենա ներքաղաքական խնդիրների հետ, որ ՀՅԴ-ի հետ նորից կոալիցիա կազմեն՝ նա պատասխանեց, որ ամեն ինչ չի կարելի կապել ներքաղաքական զարգացումների հետ:
Պարոն Արզումանյանը ավելի շուտ կապ տեսավ Ցեղասպանության 100-րդ տարելիցի հետ, որովհետեւ, ըստ նրա, մյուս տարելիցին այդքան մեծ հետաքրքրություն կարող է չլինել, գուցե սա պատասխան էր Գալիպոլիի ճակատամարտի միջոցառումների հրավերին:
Հարցին՝ փաստաթուղթը հետ կանչելը նշանակում է, որ այն արդեն գոյություն չունի՞, թե՞ քանի դեռ ստորագրություն կա դրա տակ, այն կենդանի է մնում՝ Ալեքսանդր Արզումանյանը պատասխանեց. «Միջազգային որեւէ պայմանագիր ենթադրում է վավերացում եւ գործում է միայն վավերացումից հետո՝ անկախ նրանից՝ դրա տակ ստորագրություն կա՞, թե՞ ոչ: Կարելի է հրապարակում այրել եւ ասել՝ մահ Թուրքիային»:
Կարդացեք նաև
Անդրադառնալով Ուկրաինայի զինադադարին՝ նա ասաց, որ դրական էր պայմանագիրը, որը ստորագրվեց, բայց այնտեղ կան թաքնված ռումբեր. «Արդեն ակնհայտ է, որ չի գործելու պայմանագիրը: Դա Պուտինի, Եվրոպայի համար դեմք փրկելու հնարավորություն էր: Ինչ-որ զինադադար կլինի որոշակի ժամանակահատվածում, բայց պայմանագիրն այնպիսի կետեր ունի, որ ինչ-որ պահի կողմերից մեկը հրաժարվելու է: Պուտինը հրաժարվեց, որ Ուկրաինայի սուվերեն երկրի սահմանը վերահսկվի ուկրաինացիների կողմից: Դա միջամտություն էր Ուկրաինայի ներքին գործերին: Պորոշենկոն պետք է գիտակցի, որ չունի մեծամասնություն: Զարգացումները տանում են նրան, որ որոշ ժամանակ անց կարող է ավելի մեծ ուժգնությամբ սկսեն ռազմական գործողությունները»:
Մեր հարցին, այսինքն, ըստ Ձեզ, 16 ժամ տեւած այդ քննարկումներն անպտո՞ւղ են՝ նա պատասխանեց. «Մերկելն ու Օլանդն ունեն ընտրողներ, այդ ընտրողներին պետք էր արդյունք ներկայացնել: Նրանք նախընտրական գործողություններ են անում: Այնուամենայնիվ, մարդկանց կյանքեր փրկվեցին, հնարավոր է նաեւ ուրվագիծ եղավ ապագա լուծման համար: Այդ փաստաթուղթը կարող է հիմք լինել ապագա քննարկումների համար»:
Հռիփսիմե ՋԵԲԵՋՅԱՆ
