Իջեւանի տարածաշրջանի Աճարկուտ համայնքի ղեկավար Ռաֆիկ Օհանյանն ասաց, որ իր 9 խոշոր եղջերավոր անասունը գողացել են: Գողացված անասուններից 3 կով են, 2-ը՝ հղի երինջ, 2-ը՝ ցուլ, 2-ը` մոզի: Գյուղապետին պատկանող թվով 10 խոշոր եղջերավոր անասուններից նրա անասնագոմ է վերադարձել միայն մեկ մոզի, որը առանձին չպահելու համար մորթել են: Օհանյանն ասաց, որ իր կովերը շատ արժեքավոր էին,դրանցից յուրաքանչյուրը օրական մինչեւ 20 լիտր կաթ էր տալիս: Նա հայտնեց, որ իրենց գյուղն անտառի եզրին է, Աճարկուտում անասունները ոչ թե արոտի են տանում, այլ ազատ են թողնում,որպեսզի դրանք գնան արոտավայր: Ձյուն տեղալուն պես անասուններն անտառից գյուղ են վերադառնում: Աճարկուտում ձյուն է տեղացել մոտ 10 օր առաջ, անասուններն Աճարկուտ, Ռաֆիկ Օհանյանի անասնագոմ չեն վերադարձել: Գյուղապետը հայտնեց,, որ անասնագողերը հավանաբար անասուններին ձորն են իջեցրել, ավտոճանապարհի եզր եւ դրանք ավտոմեքենայով տեղափոխել: Նա անասունների անհետանալու մասին գրավոր հայտարարություն է տվել ոստիկանության Իջեւանի բաժին, սակայն քիչ հույս ունի, որ գողությունը կբացահայտվի:
Ռաֆիկ Օհանյանը հայտնում է , որ 1996թ. կատարված գողության ժամանակ անհայտ անձինք գողացել են իր 12 գլուխ խոշոր եղջերավոր անասունը, իսկ 2007թ.՝ եւս 3 հատ անասուն: «Կարելի է ասել, որ անցած տարիներին իմ ստացած աշխատավարձի գումարի չափ ինձնից գողացել են»՝ դառնությամբ ասում է Ռ. Օհանյանը: Հավելենք, որ Ռ. Օհանյանը 185 բնակիչ ունեցող Աճարկուտ համայնքը ղեկավարում է 1991 թվականից:
Ոսկան ՍԱՐԳՍՅԱՆ
