ՀՀ Կոտայքի մարզպետ Ա. Հարությունյանի նախաձեռնությամբ մարզի Աբովյանի տարածաշրջանի համայնքներում բնակվող 7 և ավելի երեխաներ ունեցող մայրերին, ինչպես նաև 100 տարեկան և ավելի տարիք ունեցող բնակչուհիներին կանանց տոնական միամսյակի կապակցությամբ շնորհավորելու նպատակով կազմակերպվել է հանդիսավոր միջոցառում:
Կոտայքի մարզպետարանի Աբովյանի ներկայացուցչության նիստերի դահլիճում տեղի ունեցած միջոցառմանը մասնակցել են նաև մարզպետարանի պաշտոնատար անձինք և տարածաշրջանի քաղաքային ու գյուղական համայնքների ղեկավարները:
Կոտայքի մարզպետ Ա. Հարությունյանն իր շնորհավորական խոսքում հերթական անգամ կարևորել է հայ կնոջ բացառիկ դերն ու նկարագիրը և ընդգծել, որ պատմական բոլոր իրողություններում հայ կինն ունեցել է իր առանցքային մասնակցությունը:
Հրավիրյալ տիկնանց համապատասխան խրախուսանքներ և ծաղկեփնջեր հանձնելուց հետո Կոտայքի մարզպետը զրուցել է վերջիններիս հետ, պատասխանել նրանց կողմից բարձրացվող հարցերին ու ընդգծել, որ իրենք մշտապես գտնվելու են մարզպետարանի հոգատարության ներքո:
Հավելենք, որ կանանց տոնական միամսյակի շրջանակներում մարզում տեղի ունեցող միջոցառումների շարքն առաջիկայում համալրվելու է նոր ձեռնարկներով ևս:
ՀՀ Կոտայքի մարզպետարանի
աշխատակազմի տեղեկատվության
և հասարակայնության հետ կապերի բաժին
