Այսօր «Ժառանգության» պատգամավոր Զարուհի Փոստանջյանը հայտարարության նախագիծ էր առաջարկում ընդունել «Հայոց ցեղասպանության 100-րդ տարելիցի համահայկական հռչակագրի ընդունման մասին»: Արտաքին հարաբերությունների մշտական հանձնաժողովում բուռն քննարկումների արժանացավ այն, որովհետեւ նախագիծը տառացիորեն նույն համահայկական հռչակագիրն էր, ոչ մի ստորակետի փոփոխություն չկար:
Հանձնաժողովի նախագահ Արտակ Զաքարյանը, ի տարբերություն հանձնաժողովի ՀՀԿ-ական անդամների՝ Արտաշես Գեղամյանի, Համլետ Հարությունյանի, որոնք դեմ արտահայտվեցին, ասաց, որ ինքը կողմ է, որ լինի նման հայտարարություն:
Բայց նա խնդրեց նախագիծը հետաձգել, «Մի հատ էլ քննարկում անենք, նոր որոշում կայացնենք»:
Զարուհի Փոստանջյանը համաձայնեց: Ի վերջո որոշվեց երեքշաբթի առավոտյան հանձնաժողովի նիստ անել, եզրակացություն տալ եւ այն ընդգրկել լիագումար նիստերի օրակարգ:
Կարդացեք նաև
Զարուհի Փոստանջյանն էլ ասաց, որ ինչ տեքստ էլ գրվի, նպատակն այն է, որ ԱԺ-ն ողջունում է այդ փաստաթուղթը. «Ես սա ասում եմ որպես իրավաբան, դա շատ կարեւոր է: Իրավական հիմք է պետք, եւ դրույթները շատ անհրաժեշտ են»:
Արտակ Զաքարյանը համաձայնեց. «Պետք է ոչ թե նույն տեքստի կրկնությունը լինի, այլ նոր տեքստ, որ մենք ողջունում ենք այս փաստաթուղթը: Մենք իրավունք չունենք այս գյոզալ փաստաթղթից ավելի ցածր փաստաթուղթ ընդունենք կամ վնասենք այս փաստաթղթին»:
Հռիփսիմե ՋԵԲԵՋՅԱՆ
