Aravot.am-ը ՀՀ ԿԳ նախարարության հանրակրթության վարչության պետ Նարինե Հովհաննիսյանին խնդրեց մեկնաբանել Տնտեսական համագործակցության եւ զարգացման կազմակերպության անցկացրած հետազոտության արդյունքները , ըստ որոնց Հայաստանի դպրոցական կրթության արդյունավետությամբ 50-րդն է 76 երկրների շարքում:
Տիկին Հովհաննիսյանը նշեց, որ այդ արդյունքները 4 տարվա վաղեմություն ունեն:
«Հետազոտության արդյունքները 4 տարի առաջվա «Թիմս» միջազգային վարկանիշավորման, գնահատման ստուգատեսի արդյունքում է գոյացել, եւ այդ հետազոտության համաձայն Հայաստանն իսկապես 50-րդ տեղում է եղել, տարածաշրջանում զիջում ենք միայն Թուրքիային, Վրաստանից ու Իրանից առաջ ենք, իսկ Ադրբեջանի տվյալներն ընդհանրապես չկան: 4 տարի առաջ «Թիմսի» այս միջոցառումը Հայաստանում անցկացրել ենք բավականին խիստ պայմաններում, ինչպես միասնական քննությունները: Երեխաներն իրարից օժտվելու հնարավորություն չեն ունեցել, այստեղ ստոուգատեսն անցկացվել է խիստ եւ շատ թափանցիկ: Ի դեպ, այս տարի նույնպես Հայաստանը մասնակցել է այդ վարկանիշավորմանը, որի արդյունքները կլինեն 5-6 ամիս հետո: Կարծում եմ, որ այս անգամ ավելի բարձր ցուցանիշներ կունենանք»,-հույս հայտնեց ԿԳՆ հանրակրթության վարչության պետը:
Գոհար ՀԱԿՈԲՅԱՆ
Կարդացեք նաև
