Այսօր ԱԺ-ում Էկոնոմիկայի փոխնախարար Էմիլ Տարասյանը ներկայացրեց նախարարության 2014-ի բյուջեի կատարման հաշվետվությունը:
ՀԱԿ խմբակցության քարտուղար Արամ Մանուկյանը նրան հարցրեց՝ Դուք տնտեսական քաղաքականություն իրականացնող եք եւ ոչ մի մխիթարող բան չկա 2014-ին՝ 2013-ի հետ համեմատած: Պետական պարտքն ավելանում է, ներդրումները քչանում են, տրանսֆերտները պակասել են, մարդկային ռեսուրսը, ֆինանսական ռեսուրսը դուրս է գալիս: Մակրոտնտեսական որեւէ ցուցանիշ, ոչինչ հուսադրող չկա. «Ի՞նչն է խանգարում մեր երկրին, կարո՞ղ եք ասել, որոնք են այն մարտահրավերները, որոնք թույլ չեն տալիս ՀՀ տնտեսական զարգացմանը»:
Փոխնախարարը պատասխանեց. «Ես այդքան վատատեսորեն չէի վերաբերվի, իմ ձեռքի տակ կան վիճծառայության թվեր: Ես թվեր կարող եմ հնչեցնել, որոնք բավականին դրական տենդենց են արձանագրել: Ունենք գյուղատնտեսության աճ, օրինակ: Կան դրական ցուցանիշներ: Մենք մեծ ուշադրություն ենք դարձնում գիտական ուղղությունների, նորարական տեխնոլոգիաների զարգացմանը»:
Արամ Մանուկյանը պատասխանից դժգոհ մնաց՝ ոչ մի բառ չասացիք՝ կոռուպցիա, ստվեր, վատ օրենքներ, վատ կազմակերպված քաղաքականություն. «Եթե դուք դրանք չեք ասում, սրանք չկայի՞ն ձեզ համար, թե՞ ռիսկ չեք անում ասեք: Ախր սա է իրականությունը: Հայկական կապիտալը գնում է Վրաստան, ասեք մի կազմակերպություն, որ Վրաստանից եկել է Հայաստան: Գիտական մարդիկ, մշակութայինը, սպորտը, բոլորը ՀՀ-ից դուրս են գալիս: Սա այն միջավայրը չի, այս միջավայրից գնում են: Ես քաղաքական գործիչ եմ, տնտեսագետ չլինելով տեսնում եմ, որ այն միջավայրը, որը կարող է ստեղծել արտադրություն, բարիք, շահույթ, չկա ՀՀ-ում»:
Կարդացեք նաև
Փոխնախարարն ասաց, որ ստվերի կրճատման ուղղությամբ աշխատում են. «Այն լուսավոր կետը, որ տնտեսության մեջ տեսնում ենք, տեխնոլոգիական զարգացումն է»:
Հռիփսիմե ՋԵԲԵՋՅԱՆ
