Հունիսի 12-ին «Երեխաների խոցելի խմբի մասնագիտության կողմնորոշման աջակցություն» ծրագրի շրջանակում Արմավիրի, Կոտայքի մարզերի և Երևանի խոցելի խմբի շուրջ 70 երեխա ճանաչողական այցով եղան ՏԿԱԻՆ ճգնաժամային կառավարման պետական ակադեմիայում, ապա այցելեցին ՏԿԱԻ նախարարություն: Ծրագիրն իրականացվում է նախարարության և «Ռոտարի» Երևանի ակումբի հետ համատեղ:
Ճգնաժամային կառավարման պետական ակադեմիայում երեխաները ՀՀ ՏԿԱԻ փրկարար ծառայության տնօրենի տեղակալ , փ/ծ գեներալ-մայոր Աստվածատուր Պետրոսյանի, ակադեմիայի առաջին պրոռեկտոր Սայաթ Շիրինյանի, «Ռոտարի» ակումբի ներկայացուցիչների գլխավորությամբ ծանոթացան կրթական համալիրի գործունեության առանձնահատկություններին, շրջայց կատարեցին հաստատության լսարաններում, 911 ծառայության բլոկում, մասնագիտական գրականությամբ հագեցած գրադարանում, որը հարուստ է նաև խոցելի խմբերի համար նախատեսված գրքերով: Շրջայցի ավարտին Փրկարարական ֆակուլտետի դեկանի տեղակալ, գնդապետ Սամվել Շահմուրադյանը և հակահրդեհային պատրաստվածության ցիկլի պետ, փոխգնդապետ Հովհաննես Խաչատրյանը պատասխանեցին երեխաների հարցերին:
ՏԿԱԻ փրկարար ծառայության տնօրենի տեղակալ, փ/ծ գեներալ-մայոր Աստվածատուր Պետրոսյանը նշեց, որ այս ծրագրի նպատակն է աջակցել Երևանի և մարզերի ծնողազուրկ, հաշմանդամ, անապահով ընտանիքների, ռիսկային խմբերի, խնամքի հաստատություններում բնակվող 12-16 տարեկան երեխաներին մասնագիտական կողմնորոշման հարցում: «Փրկարարները պետք է զինված լինեն նաև գիտելիքներով, որպեսզի կարողանան օգնել և իրենց, և իրենց կարիքն ունեցողներին: ՏԿԱԻ նախարարի հետ պայմանավորվածություն կա, որ խոցելի խմբի երեխաներն այս ակադեմիայի բոլոր ֆակուլտետներում կարող են սովորել անվճար»,-նշեց Ա. Պետրոսյանը: Նրա խոսքով` ակադեմիայի 350 շրջանավարտ ներկայումս աշխատում է նախարարության համակարգում՝ տարբեր պաշտոններում:
ՏԿԱԻ նախարարությունում երեխաների խմբին ընդունեց ՀՀ ՏԿԱԻՆ փրկարար ծառայության տնօրենի տեղակալ, փ/ծ գեներալ-մայոր Նիկոլայ Գրիգորյանը: Նա անդրադարձավ նախարարության ստեղծման պատմությանը, ձեռքբերումներին, 911 ծառայությանը, հավելելով, որ այս տարեվերջին Հայաստանը,հավանաբար, կմիանա INSARAG միջազգային որոնողափրկարարական խորհրդատվական խմբին: Նախարարությունն այն միակ պետական մարմինն է, որի համակարգում աշխատում է 30 սայլակավոր հաշմանդամ: ՀՀ ՏԿԱԻՆ փրկարար ծառայության տնօրենի տեղակալ, փ/ծ գեներալ-մայոր Ն. Գրիգորյանը պատասխանեց երեխաների հարցերին:
Հանդիպման ավարտին «Ռոտարի» ակումբի նախագահ Լիլիթ Ավետիսյանը շնորհակալություն հայտնեց ջերմ ընդունելության և արդյունավետ համագործակցության համար, որը շարունակական է լինելու: «Այս հանդիպումից հետո ես հպարտ եմ, որ մենք ունենք այսպիսի փրկարարական համակարգ և համոզված եմ, որ դուք միշտ մեր կողքին եք»,-ասաց նա:
Նախարարություն ճանաչողական շրջայցն ավարտվեց երեխաների այցելությամբ Ճգնաժամային կառավարման ազգային կենտրոն,որտեղ նրանք ծանոթացան 911 ծառայության աշխատանքային գործընթացին։
ՀՀ ՏԱՐԱԾՔԱՅԻՆ ԿԱՌԱՎԱՐՄԱՆ ԵՎ ԱՐՏԱԿԱՐԳ
ԻՐԱՎԻՃԱԿՆԵՐԻ ՆԱԽԱՐԱՐՈՒԹՅՈՒՆ
