Թուրքագետ Գեւորգ Պետրոսյանը չի բացառում առաջիկայում Թուրքիայում նոր խորհրդարանական ընտրությունները, ինչի թիրախում կհայտնվի քրդական քաղաքական ուժերի միավորումը: Այս մասին այսօր թուրքագետն իր տեսակետը բարձրաձայնեց «Զարկերակ» մամուլի ակումբում:
«Թուրքիան շարունակվում է առերեսվել իր համար լուրջ ու խորքային խնդիրների հետ: Թուրքիայի համար խնդիրների խնդիրը`քրդական հարցը, առավել քան սրված է: Դրան գումարվել են նաեւ հակասությունները Իսլամական պետության հետ, նոր կառավարության ձեւավորումը»,- ասաց նա: Այս խնդիրները թուրքագետը մեկ փաթեթում է դիտարկում ու կարծում է, որ Ռեջեփ Թայիբ Էրդողանն, ամենայն հավանականությամբ կգնա Թուրքիայում նոր ընտրությունների անցկացման`քրդական գործոնը բացառելու համար:
Անցած խորհրդարանական ընտրություններում քրդական ուժերի միավորումը 13 տոկոս ձայն հավաքեց, ու թուրքական խորհրդարանում ներկայացված է 80 պատգամավորով`թույլ չտալով Էրդողանին միահեծան կառավարություն ձեւավորել: Ուստի, թուրքագետի համոզմամբ, ամեն ինչ տանում է արտահերթ ընտրությունների`քրդական կուսակցությանը քաղաքական դաշտից դուրս թողնելու եւ մեկ խնդիր նվազեցնելու համար:
Առաջիկա հինգշաբթի օրն արդեն պարզ կլինի` Քեմալական ժողովրդահանրապետական ու Էրդողանի Արդարություն եւ զարգացում կուսակցությունների միջեւ հնարավո՞ր է կոալիցիան:
Կարդացեք նաև
Հարցին`այս զարգացումներն իրավիճակ կփոխե՞ն Թուրքիայի քաղաքական կյանքում, բանախոսն արձագանքեց, որ այս իրավիճակն աննախադեպ է Թուրքիայի վերջին երկու տարիների կյանքում. «Բայց պետք է սպասել ընտրությունների, եթե դրանք լինելու են: Քրդական ժողովուրդների դեմոկարտիան եթե չկարողանա անցնել, այո, կտրուկ իրավիճակ կփոխվի: Իսկ ամեն ինչ արվում է, որ չանցնի: Այդ դեպքում զինված ապստամբներին նաեւ քաղաքական տարրերը կգումարվեն, ու բավական բարդ իրավիճակ կստեղծվի»: Լուրջ ապստամբություն թուրքագետը չի կանխատեսում, սակայն, առանձին օջախներ «կպայթեն»`լարելով իրավիճակը:
Թուրքական գործընթացներից, ըստ Գեւորգ Պետրոսյանի, Հայաստանը պետք է դրականը քաղի ու չվախենա թուրք-քրդական հակամարտության սրումից: Այդ խնդիրը 1984 թվականից կա. դա մեզ համար նորություն չէ. «Թուրքիայում ներքին անկայուն վիճակը բխում է ՀՀ-ի շահերից, քանզի իր ներքին խնդիրներով զբաղված, Թուրքիան արտաքին ոլորտում չի կարողանում ՀՀ-ի դեմ համակագված պայքար տանել»:
Նելլի ԳՐԻԳՈՐՅԱՆ
