Տարեցների միջազգային օրվա առիթով Երևանի քաղաքապետ Տարոն Մարգարյանի հանձնարարությամբ քաղաքապետարանի աշխատակազմի սոցիալական ապահովության վարչության պետ Ռուզաննա Զաքարյանը այցելել է Նորքի, ինչպես նաև հ. 1 տուն-ինտերնատներ:
Սովորաբար, այդպիսի այցերը դատարկաձեռն չեն լինում: Տարեցների այս երկու հաստատություններին է փոխանցվել մարզագույք, որը տրամադրելու վերաբերյալ Երևանի քաղաքապետին էր դիմել ՀՀ աշխատանքի և սոցիալական հարցերի նախարարը ` ավագ սերնդի ներկայացուցիչների ակտիվ հանգիստը կազմակերպելու համար:
Տարեցների միջազգային օրվա առիթով Նորքի տուն-ինտերնատ այցելած ՀՀ աշխատանքի և սոցիալական հարցերի նախարար Արտեմ Ասատրյանը կարևորել է Երևանի քաղաքապետարանի հետ համագործակցությունը` նշելով որ, ի դեմս քաղաքապետ Տարոն Մարգարյանի, Երևանի քաղաքապետարանը մշտապես ուշադրության կենտրոնում է պահել տարեցներին և հնարավորին աջակցել նրանց կյանքի պայմանների բարելավմանը: Օրվա խորհրդով կազմակերպված հանդիսության ընթացքում քաղաքապետարանի աշխատակազմի սոցիալական ապահովության վարչության պետ Ռուզաննա Զաքարյանը Երևանի քաղաքապետ Տարոն Մարգարյանի անունից շնորհավորել է տարեցների միջազգային օրը, և նշել, որ այն համընկել է մայրաքաղաքի ծննդյան 2797-րդ տարեդարձի նախօրյակին իրականացվող սոցիալական ծրագրի մեկնարկին, որի շրջանակում սոցիալապես անապահով, սակայն նաև սոցիալական տարբեր շերտերի կնվիրաբերվի կենցաղային տեխնիկա: Իսկ 100 տարին բոլորած 19 անձանց` նաև դրամական աջակցություն:
Շնորհակալություն հայտնելով ուշադրության և հոգատարության համար՝ տարեց քաղաքացիները նկատել են, որ Երևանի քաղաքապետարանի կողմից նման վերաբերմունքի են արժանանում ոչ միայն այս կամ այն տոնի առիթով: Տոնական սեղանների շուրջ միմյանց շնորհավորելուց հետո ավագ սերնդի ներկայացուցիչները նաև ասմունքել են ու պարել:
Կարդացեք նաև
Երևանի քաղաքապետարան
