Քաղտեխնոլոգ Վիգեն Հակոբյանը վստահ է, որ Սահմանադրական փոփոխությունների դեմ ձեւավորված «Ոչ-ի» շարժումներին չի հաջողվի միասնական ճակատով հանդես գալ: Ըստ նրա, հասարակության կողմից ոչ մի լուրջ հետաքրքրություն չի նկատվում սահմանադրական փոփոխությունների գործընթացի նկատմամբ, որովհետեւ ժողովրդի մեծ մասը որևէ լուրջ ակնկալիքներ սահմանադրության փոփոխությունից չունի. «Իրենց առօրյան, ապագան Սահմանադրության հետ չեն կապում, դրա համար լուրջ արձագանքներ ո՛չ «այո»-ի, ո՛չ էլ «ոչ»-ի պարագայում չենք նկատում, թեև ակտիվ քարոզչությունը դեռ չի սկսվել»:
Իսկ սահմանադրական փոփոխությունները տապալել կհաջողվի՞ հարցին, պարոն Հակոբյանը հակված է ոչի պատասխանին. «Առայժմ չեմ տեսնում այն ռեսուրսը, որը կարող է խոչընդոտել սահմանադրական փոփոխությունները»:
Նա որեւէ կապ չի տեսնում Ռուսաստանի հայերի միության նախագահ Արա Աբրահամյանի՝ քաղաքականություն մտնելու հայտի ու սահմանադրական փոփոխությունների հետ. «Կարծում եմ՝ ավելի շատ ինտրիգը պարունակում է ոչ թե իշխանության և ընդդիմության պայքարը, այլ իշխանության մեջ ուժերի վերադասավորումը»:
Քաղտեխնոլոգի խոսքով, հնարավոր է առաջիկայում ակտիվանա նաեւ
նախկին վարչապետ Տիգրան Սարգսյանը: Ըստ նրա, Տիգրան Սարգսյանը հնարավոր է համագործակցության եզրեր գտնի Արեւմուտքի հետ. «Հենց այդ պատճառով էլ որոշվեց, որ 2016-ին նա կգլխավորի ԵՏՄ գերագույն մարմինը:
Կարդացեք նաև
Ներքին քաղաքական գործոնը նույնպես կապ ունի նրա նշանակման հետ: Կարծում եմ, որ Սերժ Սարգսյանը փորձում է այսօրվա ներքաղաքական դաշտում հավասարակշռություն մտցնել` ակտիվ քաղաքականություն վերադարձնելով իր վստահելի դեմքերից մեկին: ԵՏՄ գերագույն մարմինը գլխավորելը որոշ առումով նոմինալ պոստ է, բայց բոլորիս էլ հասկանալի է, որ դա, այնուամենայնիվ, տեխնիկական պաշտոն է»:
Պարոն Հակոբյանը վկայակոչեց որոշ մոսկովյան աղբյուրների եւ ասաց, որ այդ աղբյուրների համաձայն վերջին մեկ տարվա ընթացքում Տիգրան Սարգսյանն ավելի շատ գտնվել է Մոսկվայում և Սանկտ Պետերբուրգում, քան Վաշինգտոնում, այսինքն` նրա վերադարձը ակտիվորեն նախապատրաստվել է:
Հիշեցնենք, որ ՀՀ նախկին վարչապետ Տիգրան Սարգսյանը 2016թ. փետրվարին կգլխավորի ԵՏՄ գերագույն մարմինը՝ Եվրասիական տնտեսական հանձնաժողովը:
Արփինե ՍԻՄՈՆՅԱՆ
