«Ինձ եք կարոտել, թե՞ ոլորտն եք կարեւորում»,- ԱԺ-ում ներկայացված «Բարձրագույն եւ հետբուհական մասնագիտական կրթության մասին» օրենքում փոփոխությունների նախագծի բուռն քննարկումը սրանով պայմանավորեց Արմեն Աշոտյանը:
Ըստ նրա, հազվադեպ է, որ երկրորդ ընթերցման ժամանակ այսպիսի շահագրգիռ քննարկում է ծավալվում:
Արմեն Աշոտյանը դիմելով պատգամավորներին՝ ասաց. «Մի՛ նեղացեք, եթե առաջին ընթերցման ժամանակ հնչել են արժեքավոր առաջարկություններ, որոնք մենք հաշվի չենք առել: Մենք ԱԺ կանոնակարգ օրենքով կարող ենք ու պարտավոր ենք անդրադառնալ բացառապես գրավոր առաջարկություններին: Բայց նույնիսկ դա էլ պրոբլեմը չէր: Եթե ես հիշեի՝ ինչ եք խոսել, կվերցնեի որպես գաղափարներ: Ցավոք, իմ ողջ հարգանքով հանդերձ, դուք Հիսուս Քրիստոսը չեք, ես էլ Ղուկասը չեմ, որ ձեր հետեւից ման գամ ու գրեմ, թե ինչ եք ասում, մի օր կարող է պետք գա»:
Նա հորդորեց, որ չզլանան պատգամավորները եւ գրավոր առաջարկություն անեն:
Կարդացեք նաև
Ինչ վերաբերում է ՀԱԿ խմբակցության քարտուղար Արամ Մանուկյանի քննադատություններին՝ Աշոտյանն արձագանքեց. «Բժշկության մեջ այսպիսի տերմին կա, կոչվում է՝ ֆանտոմային ցավեր: Երբ վերջույթի որեւէ հատված արդեն գոյություն չունի, բայց հիվանդին թվում է, որ այն դեռ գոյություն ունի ու ցավում է: Սահմանադրական հանրաքվեի մասին խոսել՝ կրկնելով քանիցս հակադարձված արտահայտություններ՝ ինձ մոտ արդեն սահմանադրական ֆանտոմային ցավերի տպավորություն են թողնում ընդամենը»:
Հռիփսիմե ՋԵԲԵՋՅԱՆ