Այսօր երեկոյան արդեն պարզ կդառնա`մարտի 1-ին Ազատության հրապարակում հանրահավաքի «գլխավոր հրամանատարը» կլինի ՀԱ՞Կ-ը, թե՞ «Նոր Հայաստանը»: Ինչպես հայտնի է, երկու քաղաքական միավորներն էլ հայտ էին ներկայացրել, երկուսն էլ Երեւանի քաղաքապետարանի կողմից ի գիտություն են ընդունվել:
Այսօր «Փաստարկ» մամուլի ակումբում լրագրողները ՀԱԿ խորհրդարանական խմբակցության ղեկավար Լեւոն Զուրաբյանից հետաքրքրվեցին`ի վերջո ընդհանուր հայտարարի կգա՞ն ՀԱԿ-ն ու «Նոր Հայաստանը»: Լեւոն Զուրաբյանը մանրամասնեց, որ երեկ չէ առաջին օրը «Նոր Հայաստանի» ներկայացուցիչներ Գարեգին Չուգասզյանը եւ Հմայակ Հովհաննիսյանը ՀԱԿ գրասենյակ են գնացել, այնտեղ նրանց ասել են, որ ծրագիր ունեն, մանրամասնել են այդ ծրագիրը եւ առաջարկել են ավելորդ խնդիրներ չստեղծել ու միասնական միջոցառում անել: «Այսօր պիտի հանդիպենք, որ իրենց պատասխանը լսենք»,- ասաց Լեւոն Զուրաբյանը:
Իսկ այն, որ քաղաքապետարանն ի գիտություն է ընդունել երկու հայտերն էլ, Լեւոն Զուրաբյանը համարում է իշխանության կողմից սադրանք: Բայց վստահեցնում է` իշխանությունները չեն հաջողի, իրենք լուծումներ կգտնեն:
Նելլի ԳՐԻԳՈՐՅԱՆ
