«Գրական դաշտում դեռեւս չլուծված մեծ խնդիր կա. պետությունը մշակութային չէ: Ազգային ժողովի դեմքերը, որ տեսնում ես, մշակութային շոկ ես ապրում: Հիմա հեռուստացույց քիչ ես նայում, կարող ես խուսափել դրանից»,-ասում է գրող-սցենարիստ Վահրամ Մարտիրոսյանը:
«Ով Հայաստանից պոկվում է, կարողանում է դրսում մշակույթ ներկայացնել, օրինակ` Տիգրան Համասյանը: Մեր սփյուռքն էլ ոչ թե մշակութային է, այլ առեւտրական, արվեստավորական, ոսկերչական… Արտասահմանում ունենալով երեք անգամ ավելի շատ հայեր` չունենք թարգմանիչների արժանապատիվ քանակ»,-«Զարկերակ» մամուլի ակումբում այսօր նշեց նա:
Հիշեցնենք, որ մարտի 3–ը գրողների միջազգային օրն է:
Կարդացեք նաև
Վահրամ Մարտիրոսյանի խոսքով` յուրաքանչյուր ընթերցող պետք է վերլուծի` ինչ լումա է ներդնում մշակույթի զարգացման գործում, օրինակ` գնում է Արմենչիկի համերգի տոմս, թե գիրք. «Մենք մշակութային չենք: Քննարկման մեջ է կայանում ճշմարտությունը: Հին Հունաստանում մշակույթը զարգանում էր ճեմարաններում: Մարդիկ սյունասրահներում ճեմելով գնում-գալիս էին ու զարգանում էին փիլիսոփաների հետ զրուցելով»:
Նշենք, որ Վահրամ Մարտիրոսյանն, ըստ «Արմենպրես»-ի, ճանաչվել է տարվա ժամանակակից հայ գրող:
Գրող, թարգմանիչ Արթուր Մեսրոպյանն էլ անդրադարձավ առավել շատ սպառվող գրքերին` ասելով, որ ընթերցողներին հիմնականում հետաքրքրում են անձնական հարաբերությունների մասին գրքերը, որոնք նաեւ սեռական հարաբերությունների նկարագրություններ են պարունակում:
Մեսրոպյանը նաեւ փաստեց, որ ժամանակակից հայ գրողների վեպերը թարգմանվում են եւ պահանջված են նաեւ օտարերկրացիների համար:
Լուիզա ՍՈՒՔԻԱՍՅԱՆ
