Երևանի «Մխիթար Սեբաստացի» կրթահամալիրում այսօր ամփոփվեցին հանրակրթական Դիջիթեք՝ «Թվային միջոցները արդյունավետ կրթության գործիքներ» ամենամյա 8-րդ, բնագիտա-տեխնիկական ստեղծագործության ամենամյա 3-րդ, մարմնամարզական ամենամյա 3-րդ ստուգատեսների արդյունքները:
Ստուգատեսներին մասնակցել են Հայաստանի և Վրաստանի հանրակրթական հաստատություններում սովորողներն ու աշխատողները՝ ներկայացնելով ուսուցման-ինքնուսուցման իրենց փորձն ու արդյունքները, ստեղծագործական նախագծեր, ուսումնական նյութեր և այլն:
Ներկայացված աշխատանքներին, ինչպես նաև հաղթողների անուններին կարելի է ծանոթանալ ստուգատեսների կայքերում, «Դպիր» մանկավարժական ամսագրում, mskh.am կայքում:
Ինչպես Aravot.am-ի հետ զրույցում նշեց «Դիջիթեք-2016»-ի համակարգող Էմմա Իսախանյանը, հաղթողներին ընտրում է համապատասխան հանձնաժողովը: Տարբեր անհատներ ու կազմակերպություններ էլ իրենց հերթին են հաղթողներ ընտրում ՝ արժանացնելով նրանց անվանական մրցանակների: Իսկ այս տարի առաջին անգամ նաև առցանց քվեարկությամբ են հաղթողներ եղել: Հետաքրքիր է, որ առցանց քվեարկողներից պահանջվում է նաև հիմնավորել իրենց ընտրությունը:
«Դիջիթեքն այս տարի մոտ 800 հայտ է ստացել: Տարեցտարի մեծանում է հետաքրքրությունն այս ստուգատեսի նկատմամբ: Գնալով նաև նյութերի որակն է փոխվում: Մասնակիցները հմտանում եմ, նոր ծրագրեր են սովորում, նոր բաներ են բացահայտում»,- մեզ հետ զրույցում ասաց Էմմա Իսախանյանը:
«Դիջիթեք-2016»-ի համակարգողի փոխանցմամբ՝ ստուգատեսն այս տարի հայտեր է ընդունել 14 անվանակարգերում՝ «Դիջիթեքն ընտանիքում», «Գործուն աջակցություն հանրակրթական Դիջիթեքին, հանրակրթական Դիջիթեքի տարածում», «Դիջիթեքը նախակրթարանում» և այլն:
«Յուրաքանչյուր անվանակարգ իր հստակ պահանջներն ունի, որոնց պետք է համապատասխանի ներկայացվող նյութը: Իսկ անվանակարգի, թեմայի ընտրությունը մասնակցինն է»,- նշեց մեր զրուցակիցը:
«Մխիթար Սեբաստացի» կրթահամալիրի 7-րդ դասարանի աշակերտուհի Նազելի Տեր-Պետրոսյանը, օրինակ, «Գործուն աջակցություն հանրակրթական Դիջիթեքին, հանրակրթական Դիջիթեքի տարածում» անվանակարգում ներկայացրել է իր պատրաստած գովազդային փոքրիկ հոլովակը, որի համար արժանացել է անվանական մրցանակի: Նույն անվանակարգում նա հաղթող է ճանաչվել նաև առցանց քվեարկությամբ:
«Դիջիթեքն անչափ հետաքրքիր մրցույթ է, որին գրեթե ամեն տարի մասնակցում եմ: Հաղթանակներ շատ եմ ունեցել, բայց հաղթելն անպայման չէ, թեև հաճելի է: Ինձ համար ամենահետաքրքիրը մրցույթին պատրաստվելու ընթացքն է»,- Aravot.am-ի հետ զրույցում ասաց Նազելին:
Իսկ նույն կրթահամալիրի 7-րդ դասարանի աշակերտ Տիգրան Սերոբյանը «Դիջիթեքյան ենթակայքի նոր տեսք, նոր հնարավորություններ» անվանակարգում ներկայացրել է ավագ դպրոց-վարժարանի կայքի ձևավորման իր տարբերակը: Եվ հաղթող է ճանաչվել առցանց քվեարկությամբ:
«Այս անվանակարգում ընդամենը երեք նյութ կար: Դա մեծացրեց իմ հաղթելու հավանականությունը: Արդեն երրորդ կամ չորրորդ անգամ եմ մասնակցում Դիջիթեքին: Մի անգամ էլ եմ մրցանակ ստացել: Հիշում եմ, որ այդ ժամանակ ուզում էի մրցանակս կիսել ավագ դպրոցում սովորող մի տղայի հետ, որն ինձ շատ էր օգնել մրցույթին պատրաստվելիս: Մինչև հիմա մտածում եմ, թե ինչու չկիսեցի»,- մտքերի մեջ ընկավ Տիգրանը:
Ճիշտ է, հաղթանակները ոգևորում են նրան, բայց պարտություններն էլ չեն կոտրում. «Դիջիթեքն ամենամյա մրցույթ է, մասնակցելու ու հաղթելու հնարավորություն միշտ էլ կա, նույնիսկ դպրոցն ավարտելուց հետո»,- նշեց մեր զրուցակիցը:
Սիրանուշ ՀԱՅՐԱՊԵՏՅԱՆ
