Ինչպես արդեն տեղեկացրել ենք, Հայաստանի «Ֆեմինիստ պլատֆորմը» կանանց իրավունքների պաշտպանության միջազգային օրվա կապակցությամբ քայլերթ էր կազմակերպել: Քայլերթին հաջորդել է ստեղծարար անկյունների ակտիվությունը՝ կապոեյրա, նկարչություն, պար, ձեռագործ, յոգա: Օրը կավարտվի «Էօն» հակասրճարանում, որտեղ տեղի կունենա համերգ՝ կին երաժիշտների ձեռքբերումները տոնելու նպատակով: Համերգի հասույթի մի մասը տրամադրվելու է Կանանց ռեսուրսային կենտրոնի եւ կանանց աջակցման կենտրոնի կազմակերպած ֆոնդին՝ ուղղված ընտանեկան բռնությունից տուժած կանանց աջակցությանը:
Էլվիրա Մելիքսեթյան
«Ֆեմինիստ պլատֆորմի» անդամ Էլվիրա Մելիքսեթյանը Aravot.am-ի հետ զրույցում ասաց, որ իրենք ցանկանում են բարձրաձայնել այն հանգամանքը, որ Մարտի 8-ը պարզապես ծաղիկներ նվիրելու, ստանալու, ուրախանալու օր չէ, այլ կանանց իրավունքների պաշտպանության. «Մարտի 8-ը օր է պայքարելու, ընդվզելու խտրականությունների եւ բռնությունների դեմ եւ նաեւ տոնելու ձեռքբերումները, որոնք մինչեւ այսօր մեր նախամայրերը ու մենք ունենում ենք հենց կանանց իրավունքների հարթակում»:
Էլվիրա Մելիքսեթյանը նշեց, որ իրենք յուրաքանչյուր տարի տարբեր թեմատիկա են ընտրում Մարտի 8-ը նշելու համար, այս տարի ընտրել են տարբերությունների թեման, եւ օրվա խորագիրն է՝ «Կանայք տարբեր են»:
Էլվիրա Մելիքսեթյանի խոսքերով՝ քայլերթից հետո՝ միջոցառման երկրորդ հատվածի ընթացքն արդեն ուղղված է տոնելուն կանանց իրավունքները, ազատությունները եւ ինքնորոշման իրավունքը. «Փորձում ենք ցույց տալ այն, որ կին ասելով չպետք է հասկանալ ինչ-որ մի դեր, ինչ-որ մի պիտակ, ինչ-որ մի գործառույթ: Կինը շատ բազմազան, բազմաոլորտային երեւույթ է ու յուրաքանչյուր կին ինքն է որոշում, թե որն է իր տեղը եւ դերը կյանքում եւ առհասարակ ինքն ուզո՞ւմ է դա ունենալ, թե՞ չի ուզում: Դրա համար մեր այսօրվա քայլերթի հիմնական խորագիրն ընտրել ենք ընդվզումը՝ բոլոր պիտակների, դերերի, որոնք մեզ տալիս են՝ ցույց տալու համար, որ միանշանակ ոչինչ չկա եւ յուրաքանչյուր կին ինքն է ընտրում իր ինքնորոշման ուղին: Սա մեր կյանքն է, եւ մենք ենք դրա տերը»:
Կարդացեք նաև
Ամի ՉԻՉԱԿՅԱՆ
