Հրազդանի քաղաքապետի թեկնածու Ա. Դանիելյանի ընտրական շտաբը վերսկսել է ապրիլի 2-ից դադարեցրած նախընտրական հանդիպումները:
Քաղաքի Միկրոշրջան թաղամասի տարբեր հատվածներում կայացած բակային հանդիպումների ընթացքում Հրազդանի քաղաքապետ, համայնքի ղեկավարի թեկնածու Ա. Դանիելյանը նշել է, «Այս օրերին դժվար է խոսել նախընտրական հարցերի մասին: Մեր հայրենիքի սահմաններում կա լարվածություն և մենք բոլորս այս օրերին եղել և լինելու ենք մեր սահմանապահ տղաների կողքին:
Հավերժ փառք բոլոր հերոս նահատակներին և հավերժ փառք վերջին օրերին զոհված մեր հերոս հրազդանցիներ Սարգիս Սահակյանին ու Վահե Զաքարյանին:
Մենք արդեն օրեր շարունակ դադարեցրել ենք մեր նախընտրական հանդիպումները, քանի որ տեղին չէր այս օրերին խոսել ընտրությունների մասին:
Կարդացեք նաև
Մենք չէինք կարող հրազդանցի զոհերին դեռ հողին չհանձնած գալ ու ժողովրդի հետ նախընտրական հարցեր քննարկել:
Բայց, սիրելի՛ հրազդանցիներ, թաղամասի հարգարժա՛ն բնակիչներ, արդեն մի քանի օր է մնում Հրազդանի քաղաքապետի ընտրություններին և մենք պետք է հավաքենք մեր ուժերը, ու եթե ոչ մի բանի մասին չխոսենք էլ, ապա գոնե խոսենք մեր քաղաքը կայուն պահելու մասին:
Պահպանենք քաղաքի կայունությունը, բոլորիս ուշադրության կենտրոնում պահենք մեր հայրենիքի սահմանները, գնանք ու պաշտպանենք մեր հայրենիքը»:
Հրազդանի Միկրոշրջան թաղամասի բնակիչները ևս կողմ են արտահայտվել համընդհանուր այս իրադրության մեջ քաղաքը կայուն պահելու գաղափարին ու նշել, որ հիմա ամենակարևորը մեր հայրենիքի անվտանգությունն է և իրենք այդ տրամադրվածությունից ելնելով էլ հանրապետության՝ իր մեծությամբ 4-րդ քաղաքը չեն տանի ապակայունացման:
Խոսելով Հրազդան քաղաքում առկա հիմնախնդիրներից և վերջիններիս լուծման ուղղություններից՝ Հրազդանի քաղաքապետի թեկնածու Ա. Դանիելյանն ընդգծել է, որ << Ես շատ լավ գիտեմ մեր քաղաքի բոլոր խնդիրները, գիտեմ նաև, որ Դուք՝ այս թաղամասի բնակիչներդ, մտահոգ եք որոշ շենքերի տանիքների, բակերի ասֆալտապատման, վերելակների վերագործարկման, բակերում խաղահրապարակներ ունենալու, մանկապարտեզների հիմնանորոգման և բազմաթիվ այլ խնդիրների վերաբերյալ:
Նախ նշեմ, որ մենք տանիքների վերանորոգում շատ ենք արել: Բայց այստեղ պահանջվում է անընդհատ աշխատանք: Հրազդանի նման բարդ բնակլիմայական պայմաններ ունեցող քաղաքում դժվար է հիմնանորոգված տանիքների բարվոք վիճակը երկար պահել:
Վստահեցնում եմ, որ այս աշխատանքները լիովին կատարելու ենք, ունենք մեծ ծրագիր:
Երկրի իշխանությունների, Կոտայքի մարզպետի հետ համատեղ մեծածավալ ծրագիր ենք իրականացնելու մեր բազմաբնակարան շենքերի բակերի ու քաղաքի տարբեր թաղամասերի ասֆալտապատման ուղղությամբ: Շուտով այս ասպարեզում Դուք կտեսնեք նկատելի դրական առաջընթաց:
Քաղաքի տարբեր թաղամասերում մենք սկսել ենք ինչպես բակային ասֆալտապատումը, այնպես էլ ներթաղամասային ճանապարհների ասֆալտապատումը:
Շատ լավ գիտեմ, որ տեղի բնակիչները հետաքրքրված են բակերում մանկական խաղահրապարակներ ունենալու խնդրով: Ասեմ, որ դա ներառված է մեր ծրագրերում և շուտով մեր քաղաքում արդեն իսկ առկա բազմաթիվ մանկական խաղահրապարակների կողքին, այս թաղամասի շատ բակերում ևս կձևավորվեն նոր խաղահրապարակներ>>:
Հրազդանի միկրոշրջան թաղամասի տարբեր հատվածների բնակիչները ողջունել են քաղաքի շարունակական զարգացումն ապահովելուն միտված՝ Ա. Դանիելյանի ծրագիրը և վստահեցրել, որ իրենց քաղաքապետի հետ են շարունակելու առաջիկա 4 տարիները:
Ա. Դանիելյանի ընտրական շտաբի մամուլի ծառայություն