«Հանրության շրջանում այսպիսի պատկերացում կա, որ ՀՕՊ համակարգը կարող է ցանկացած թռչող սարք հայտնաբերել, բայց ուղղաթիռը կարող է կես մետր բարձրության վրա թռնել, եւ դու ոչ մի սարքով չես հայտնաբերի այն: Բացի այդ, նռնականետով ուղղաթիռ խոցելը հեշտ չէ, զինվորը նյարդեր է ունեցել` հասակով մեկ կանգնել եւ խփել է, դա ոգի է եւ հմտություն: Նույն օրը ՀՕՊ-ի միջոցով մեկ այլ ուղղաթիռ է խոցվել, նաեւ հինգ ԱԹՍ:
Բացի այդ, հակառակորդն այդպես էլ չհամարձակվեց մարտական ինքնաթիռ կիրառել, որովհետեւ ՀՕՊ-ն իր տեղում է եղել»,-այսօր ԵՊՀ-ում ուսանողների հետ հանդիպման ժամանակ, անդրադառնալով հակաօդային պաշտպանության մասին քննադատություններին, ասաց ՀՀ ՊՆ մամուլի խոսնակ Արծրուն Հովհաննիսյանը:
Ուսանողներից մեկը հետաքրքրվեց, թե ինչու են սահման տարվել մեծ քանակության անվադողեր եւ ինչու է մեր բանակը հույսը դրել անվադողերի վրա: «Որքան էլ լավ ցանկություն ունենք, որ մեր դիրքերը «եվրո» վիճակում լինեն` գազ քաշած, նման բան հնարավոր չէ: Մենք չունենք ամերիկամեքսիկական սահման, որտեղ ինչ-որ մոլորված մարդ ուզում է սահմանն անցնել: Մենք ունենք հակառակորդի պրոֆեսիոնալ դիվերսանտներ:
Կարդացեք նաև
Թանկարժեք տեսախցիկներ եւ գեոհամակարգեր կիրառելու փորձ եղել է, բայց ականանետով կոտրել են, որովհետեւ գիտությունը զարգացել է: Կան բաներ, որոնք ոչ թե ֆինանսի հետ կապ ունեն, այլ դրանց պետք է նայել արդյունավետության տեսանկյունից: Այդ սկզբունքով, որքան էլ անվադողերը գորշ տպավորություն են թողնում, աշխարհում էլ խրամատային պաշտպանության ժամանակ հուսալի պաշտպանություն են ապահովում, որքան էլ որ դա ծիծաղելի է: Անգամ տանկով խփելու դեպքում այդ անվադողն ավելի լավ է պաշտպանում, քան քարե պատը: Յուրաքանչյուր տարի տասնյակ հազարավոր անվադողեր են հանձնվում դիրքերին, որոնց բարելավումը մշտական գործընթաց է»,-այսպես պատասխանեց Արծրուն Հովհաննիսյանը:
Լուիզա ՍՈՒՔԻԱՍՅԱՆ
