Թե ինչու այսօր վարչապետ Հովիկ Աբրահամյանը, հիշելով երկրի առջեւ ծառացած խնդիրները, կոշտ հայտարարություն արեց, հանձնարարություններ տվեց մենաշնորհների եւ կոռուպցիայի դեմ պայքարի, ինչպես նաեւ՝ ծախսերն ու գործուղումները կրճատելու մասին, իրավապաշտպան Ավետիք Իշխանյանը 2 բացատրություն ունի: Տարբերակներից մեկն այն է, որ իրավիճակային հերթական հայտարարությունն է՝ ապրիլյան դեպքերից հետո հասարակական պահանջից ելնելով եւ երկրորդ տարբերակը՝ նախընտրական տարի է:
Ավետիք Իշխանյանի խոսքերով՝ «Կարելի է շատ թերահավատորեն մոտենալ այդպիսի հայտարարություններին, որովհետեւ շատ են եղել նմանատիպ հայտարարություններ, բայց ամեն ինչ մնացել է նույն տեղում: Հնարավոր է նաեւ, որ իսկապես հասարակական պահանջը հաշվի առնելով՝ գիտակցել են, թե ինչ է կատարվում եւ ազնիվ մղումներով որոշել են կառավարման համակարգը փոփոխել: Ես շատ կուզենայի հավատալ դրան եւ սխալված լինեի, բայց այդ տարբերակին թերահավատորեն եմ մոտենում: Անհրաժեշտ է իսկապես իրավիճակը փոխել, կա պատասխանատվության հարց, ի վերջո ինչ-որ մեկը պե՞տք է պատասխանատվություն կրի: Խրատ եղա՞ն արդյոք ապրիլյան դեպքերը: Ես հակված եմ չհավատալ դրան, որովհետեւ կարելի էր այդ հայտարարությունը չանել, բայց մենք գործունեությամբ տեսնեինք, թե ինչպիսի փոփոխություններ են կատարվում: Ճիշտ կլիներ նախ լսեինք վարչապետի կողմից, որ ինքն էլ է սխալվել, որ այդքան գումարներ է ծախսել գործուղումների համար՝ առանձին օդանավ վարձելով: Մեծ ազնվություն կլիներ, որ մի քանի բարձրաստիճան պաշտոնյաներ, ընդունելով իրենց սխալները, իրենք հրաժարական տային: Այսինքն, մենք տեսնեինք գործողություններ, ոչ թե հայտարարություններ»:
Ավետիք Իշխանյանը հարցնում է Հովիկ Աբրահամյանին՝ «Արդյո՞ք այդ հայտարարությունը նշանակում է, որ իր որդին, որը Արտաշատի քաղաքապետ է, Արտաշատում այլեւս այդպիսի դեպքեր չեն լինելու՝ ազգականներին պաշտոններ տալու եւ այլն: Թող մի հատ ներկայացներ, թե որ պաշտոնյաների զավակները ինչ պաշտոններ են գրավում համակարգում ու ասեին, որ դրան պետք է վերջ դրվի: Ես սրան չեմ հավատում, որովհետեւ համակարգ, որը կառուցված է կոռուպցիայի վրա՝ ազգականներով, եթե իսկապես ինչ-որ մեկը, մասնավորապես, վարչապետը, եթե փորձի պայքարել դրա դեմ, այդ ամբողջ համակարգը կընդվզի եւ նա պարզապես դուրս կգա: Ես շատ կուզենամ սխալված լինեմ: Եթե նրա ասածները ինչ-որ չափով թեկուզ կատարվեն, ես պատրաստ եմ ներողություն խնդրել իմ ասածների համար»:
Հռիփսիմե ՋԵԲԵՋՅԱՆ
Կարդացեք նաև
