Թուրքիայի նախագահ Ռեջեփ Թայիփ Էրդողանը կնոջ՝ Էմինե Էրդողանի հետ մասնակցել է այդ երկրում գործունեություն ծավալող «Կին և ժողովրդավարություն» հասարակական կազմակերպության նոր մասնաշենքի բացման արարողությանը, որի ժամանակ ելույթ է ունեցել ներկաների առջև։ Այս մասին տեղեկացնում է Թուրքիայի նախագահական նստավայրի պաշտոնական կայքը։
Նախագահ Էրդողանի ելույթի հիմնական թեման եղել է հասարակության մեջ կնոջ դերը և դրա ընկալումները։ Իր խոսքում Էրդողանը նշել է. «Մենք գիտենք, որ կինն է ստեղծարարության գաղտնի հերոսը։ Կանայք, որոնք տնային տնտեսուհիներ են, երեխաների մայրեր, սկսել են կարեւոր ցուցանիշ ներկայացնել նաև գործարար աշխարհում»։
Իր խոսքում Էրդողանը խիստ կարեւորել է նաև կանանց՝ մայրանալու անհրաժեշտությունը. «Աշխատելու պատրվակով մայրությունից խուսափողները մերժում են իրենց կանացիությունը։ Սա իմ անկեղծ կարծիքն է։ Եթե մայրը չլինի, մարդկությունը կարո՞ղ է լինել։ Չի կարող։ Եթե կա մայր, կա նաև մարդկություն։ Այս կապակցությամբ ես ամեն առիթով խորհուրդ եմ տալիս 3 երեխա ունենալ։ Դա ես չեմ ասում, դա Ալլահն է հրամայում, Մարգարեն է ասում»։