Այսօր կառավարության ներկայացրած Հարկային օրենսգիրքը, որն արժանացել էր անգամ ՀՀԿ-ականների քննադատությանը, առաջին ընթերցմամբ ընդունվեց: ՀՀԿ խմբակցության ղեկավար Վահրամ Բաղդասարյանն ասել էր, որ քաղաքական որոշում ունեն առաջին ընթերցմամբ նախագիծն ընդունել, կողմ քվեարկել, մինչեւ կբարեփոխեն եւ բոլոր վիճահարույց դրույթները կվերանայեն:
Այնուամենայնիվ, որոշ ՀՀԿ-ականներ, հատկապես՝ գործարարությանը մոտ կանգնած, փորձել են ՀՀԿ խմբակցության քաղաքական որոշմանը չենթարկվել ու կողմ չքվեարկել: Մի մասը նախընտրել է չգալ, մյուսները՝ չքվեարկել:
Օրինակ, Սամվել Ալեքսանյանը բացակայել է քվեարկությունից, Վրեժ Մարկոսյանը ներկա է գտնվել, բայց չի քվեարկել, Սեդրակ Սարոյանը գրանցվել է, բայց չի քվեարկել: Հակոբ Հակոբյանը բացակայել է, չի մասնակցել, իսկ Մարինե Մարաբյանը, որը նաեւ ԱԺ տնտեսական հարցերի հանձնաժողովի անդամ է, ձեռնպահ է քվեարկել: Բացակայել են նաեւ Լեւոն Մարտիրոսյանն ու գեներալ Մանվել Գրիգորյանը:
Նախագծին, ինչպես տեղեկացրել ենք, դեմ է արտահայտվել ՀԱԿ-ը, ՕԵԿ-ն ու «Ժառանգությունը», ԲՀԿ ու ՀՅԴ խմբակցություններից էլ հայտարարել էին, որ ձեռնպահ են քվեարկելու:
Կարդացեք նաև
Հռիփսիմե ՋԵԲԵՋՅԱՆ
