Տավուշի մարզի Բերդի տարածաշրջանում հունիսի 10-ին տեղի ունեցած հեղեղները մեծ վնաս են տվել գյուղացիական տնտեսություններին: Վարարած գետերը վնասել են տարածաշրջանի հիդրոտեխնիկական կառույցներին: Բերդ քաղաքում վարարած Տավուշ գետը սրբել-տարել է գետամերձ տարածքում գտնվող, Բերդի բնակիչներից մեկին պատկանող, մոտ 1000 քառակուսի մետր մակերեսով հողատարածքի բերրի շերտը:
Այդտեղ ցանված էր կարտոֆիլ, բանջարանոցային այլ մշակաբույսեր: Գետը վնաս է տվել նաեւ Բերդի այլ բնակիչների հողատարածքներին: Տավուշի վարարած հոսանքը քշել- տարել է մեկուկես մետր բարձրությամբ, ավտոմեքենաների կմախքներից կառուցված կամուրջ, նաեւ՝ ռազմական նշանակության կամուրջ:
Սելավներից վարարած Տավուշը Բերդի ճանապարհաշինական ընկերության տարածքը հեղեղելով, քշել-տարել է այդտեղ կուտակված մեծ քանակությամբ ավազը: Տավուշ գետը վնաս է պատճառել շինարարական աշխատանքներ կատարող «Տավուշշին» ընկերությանը: Այդ ընկերության տարածքում գործող կաթի վերամշակման ձեռնարկությունը եւս տուժել է գետի վարարումից, ձեռնարկության տարածքը լցվել է ցեխով, քարերով:
Բերդի քաղաքապետարանը գետի վարարումից պատճառված վնասների չափերի մասին տեղեկատվությունը ներկայացրել է Տավուշի մարզպետարան: Պարզ չէ, թե կառավարությունը որեւէ կերպ կփոխհատուցի՞ բնական տարերքից տուժած Բերդի տարածաշրջանի բնակիչներին:
Կարդացեք նաև
Ոսկան ՍԱՐԳՍՅԱՆ
