«Աջակցենք սահմանամերձ բնակավայրերին» նախաձեռնության անդամ Սոֆյա Հովսեփյանը «Նոյյան տապան» մամուլի սրահում, անդրադառնալով այն իրավիճակին, որին իրենք ականատես են եղել Արթիկում, երբ մեկնել են օգնություն ցուցաբերելու տեղի բնակչությանը, ասաց. «Կարողացանք աջակել 6 բնակարանների: Այնքան ծանր էր վիճակը, որ բնակարաններից մեկի մեկ սենյակը մաքրելու համար մեկ օրն էլ բավական չէր:
«Ո՜չ թալանին» նախաձեռնության համակարգող, «Աջակցենք սահմանամերձ բնակավայրերին» նախաձեռնության աջակից Մաքսիմ Սարգսյանը մի տուն նկարագրեց, որը սարսափելի պայմաններում էր հայտնվել. «Տանտերը պատմում էր, որ անձամբ վարչապետն է իրենց տանը եղել ու նա հանձնարարական է տվել, որ նրանց տրամադրվի այլ բնակարան, սակայն վարչապետի գնալուց հետո նրանց ասվել էր, թե գնացեք վարձով ապրեք, մինչև տան հարցը լուծվի: Հոսում էր ջուրը տան պատի տակով, նկուղում կար օձ, տան հատակը ամբողջությամբ ուռած էր, այսինքն` որևէ աշխատանք այդ տների հետ չէր տարվում»:
Մաքսիմ Սարգսյանը պատմեց, թե, վերջապես, քաղաքապետին կարողացել են այդտեղ հրավիրել, նա արդարացել է, թե տեխնիկա չեն բերում, որ մաքրեն այդ տները, քանի որ ծառի ճյուղերը կկոտրվեն, ու բնակիչները կբողոքեին:
Նախաձեռնության անդամները պնդում են, որ տուժած բնակիչների վնասն ավելի շատ է, քան առաջարկվում է փոխհատուցել:
Կարդացեք նաև
Մաքսիմ Սարգսյանը գերադասեց ուշադրություն հրավիրել այն փաստի վրա, թե որտեղից է խնդիրն առաջացել. «Անգամ մասնագետ չլինելով` հասկանալի է, թե ինչու դա եղավ: Ակնհայտ է, որ այնտեղ ողջ նստվածքն ու քարերը հանքերի թափոններն են, որը կուտակվել էր այդ տարածքում: Ուժեղ անձրև է եկել և կուտակված թափոնները հավաքել բերել է: Հատված կար, որ նախկին քաղաքապետերից մեկի օրոք սելավատարը փակվել էր պանելներով, որպեսզի ելակ աճեցներ, ինչի համար բնակիչները ժամանակին դժգոհություն են բարձրացրել, սակայն ապարդյուն»:
Սոֆյա Հովսեփյանը պնդեց, որ սատկած կենդանիներ կային անասնագոմերում, ինչի հոտը շուրջն էր տարածվել, մինչդեռ քաղաքային իշխանությունները պնդում էին, որ դա ուղղակի տիղմի հոտ է:
Լուսանկարը` «Նոյյան տապան»-ի
Տաթև ՀԱՐՈՒԹՅՈՒՆՅԱՆ
