«Այս երկու շաբաթի առաջին հետեւանքը այն է, որ լրատվական դաշտը ավելի հասունացած է, ավելի սթափ է կարողանում գնահատել եւ շատ ավելի լուրջ է վերաբերվում բախումնային սցենարներին»,- օգոստոսի 1-ին «Փաստարկ» մամուլի ակումբում լրագրողների հետ հանդիպման ընթացքում ասաց «Ընդդեմ իրավական կամայականության» հասարակական կազմակերպության գործադիր տնօրեն Լարիսա Ալավերդյանը:
Նա, անդրադառնալով այն հանգամանքին, որ լրագրողները հատուկ դարձել էին բռնությունների թիրախ, ասաց, որ իր կարծիքով այդ բռնությունը գործադրել են նույն անձինք, որոնք կրակել են Մարտի 1-ին. «Ո՞վ է այդ կրակոցներն իրականացնողներից պատժվել, որեւէ մեկը չի պատժվել: Ավելին՝ փաստահավաք խմբի յոթ ամիսների ընթացքում հավաքած նյութերը անհետացել են, չկան: Այն ինչ յոթ ամիս այդքան բարձր մակարդակի իրավաբաններ աշխատել են դրանց վրա»:
Լարիսա Ալավերդյանը նշեց, որ համոզված չէ, որ կատարվածը կլուծվի, ըստ էության, և արդարացի:
Կարդացեք նաև
Անդրադառնալով պաշտոնանկություններին՝ նա չբացառեց, որ դեպքերի փոփոխություններ կլինի, սակայն, ըստ նրա, քաղաքականության փոփոխություն չի լինի. «Ինձ համար բոլորովին մեկ է, թե ով է պաշտոնատար անձը, ինձ համար կարեւոր է՝ ինչ քաղաքականություն են իրենք վարում: Չի բացառվում, որ ինչ-որ բաներ տեղի ունենան, բայց ամենեւին դրանով չէ, որ պետք է բավարարվի հասարակությունը: Հասարակության պահանջը պետք է լինի ոչ թե դեմքերի փոփոխությունը, այլ քաղաքականության փոփոխությունը: Ցավոք սրտի, մենք ունեցանք երրորդ գործող նախագահը, քաղաքականության առումով մեկը մյուսի զարգացնողն է»:
Ամի ՉԻՉԱԿՅԱՆ
