Այսօր գյուղատնտեսության նորանշանակ նախարար Իգնատի Առաքելյանն անդրադառնալով աղավնաձորցիների խաղողի մթերման խնդիրներին, կառավարության նիստից հետո լրագրողների հետ զրույցում ասաց` կառավարությունը չի կարող անվերջ դոնորի դեր ստանձնել. «Պետք է լուծում գտնել»:
Հարցին, թե ի՞նչ լուծում, պարոն Առաքելյանն ասաց` գիտեք ինչ, եթե ես լուծում ունենայի` կհայտարարեի. «Մենք աշխատում ենք այդ լուծման վրա»:
Ինչ վերաբերում է մթերած խաղողի դիմաց մթերող ընկերությունների` գյուղացիներին ունեցած «Վեդի Ալկո»-ի պարտքին, Իգնատի Առաքելյանն ասաց, որ գյուղացիների հետ համաձայնեցրել են պարտքերի մարման ժամանակացույցը.
Կարդացեք նաև
«Եթե չմարվի եւ նորից խնդիրներ լինեն, բնական է, պետությունը էլի կմիջամտի»:
Անդրադառնալով գյուղացու համար նոր կառավարության մշակած ծրագրերին, գյուղնախարարն ասաց. «Հիմնական մեր ուղղությունը լինելու է, որպեսզի օգնեն` գյուղը, գյուղացին հարստանա: Նրանք ունենան ապրելու ավելի բարձր հնարավորություններ»:
Գյուղատնտեսության նոր նախարարը դեմ է, որ չվճարելու համար առանց այդ էլ ֆինանսական ծանր վիճակում գտնվող տնտեսվարողին դատի տան եւ նա սնանկացման գնա:
Հիշեցնենք, որ գյուղատնտեսության նախկին նախարար Սերգո Կարապետյանը աղավնաձորցիներին խորհուրդ էր տվել դատի տալ «Վեդի Ալկո» ընկերությանը եւ գումարներն այդ ճանապարհով ստանալ:
Իգնատի Առաքելյանի մեկնաբանությունները` տեսանյութում:
Լուսինե ԲՈՒԴԱՂՅԱՆ
