Ակսել Բակունցը կդառնար 70 տարեկան
Օրերս Երեւանի էստրադային եւ ջազային արվեստի պետական քոլեջ էին այցելել անվանի երաժիշտներ. նշվում էր քոլեջի հիմնադիր, ճանաչված ջազմեն, ՀՀ արվեստի վաստակավոր գործիչ Ակսել Բակունցի (Կոկա, լուսանկարում) ծննդյան 70-ամյակը: Այդ առիթով քոլեջում տեղադրվեց հոբելյարի կիսանդրին, որի հեղինակը քանդակագործ Դավիթ Բեջանյանն է: Եթե չենք սխալվում, քանդակագործը հենց այդ կիսանդրին նվիրեց ջազմենին՝ «Արամ Խաչատրյան» համերգասրահում նրա 60-ամյակի առիթով կայացած երեկոյին:
Տիգրան Դավթյանը՝ Բեջանյանի «Ակսել Բակունցի» հետ:
«Առավոտի» հետ զրույցում Երեւանի էստրադային եւ ջազային արվեստի պետական քոլեջի տնօրեն Տիգրան Դավթյանը նշեց, որ Ակսել Բակունց երաժշտի դերը իսկապես մեծ է էստրադային, ջազային ոլորտում կադրերի պատրաստման հարցում, հետո էլ մանրամասնեց. «Բակունցը խորհրդային տարիներին էստրադային, ջազային ոլորտում ստեղծագործող այն սակավաթիվ երաժիշտներից էր, որն ուներ կոնսերվատորիական կրթություն (ավարտել է Երեւանի Կոմիտասի անվան պետական կոնսերվատորիան իբրեւ կոնտրաբասահար): Այդ գիտելիքները նրան օգնեցին հիմնելու եւ ղեկավարելու «Հայհամերգին» կից էստրադային ստուդիան, որն, իհարկե, հետագայում վերանվանվեց Երեւանի էստրադային եւ ջազային արվեստի պետական քոլեջի:
Երվանդ Երզնկյանը (աջից), Հովհաննես Իգիթյանը, Լեւոն Մալխասյանը եւ Վազգեն Ասատրյանը՝ Բակունցի տիկնոջ հետ:
Չմոռանանք, որ խորհրդային տարիներին նա ղեկավարեց նաեւ Հայաստանից դուրս հայտնի այնպիսի վոկալ-գործիքային անսամբլներ, ինչպիսիք են «Կռունկը», «Սերպանտինը», «Արմինան»: Հիշեցնեմ. դրանք այն տարիներն էին, երբ համապատասխան բաժիններ կամ դասարաններ դեռ չէին բացվել երաժշտական ուսումնարաններում կամ կոնսերվատորիայում: Ես նորանշանակ տնօրեն եմ, բայց կրկին հավաստիացնում եմ, որ այս կարճ ժամանակահատվածում եւ տարբեր առիթներով հոլովվում է նրա անունը՝ կապված այս ոլորտում երիտասարդ կադրեր պատրաստելու, նրանց ուղղորդելու հետ»:
Հիշատակի արարողությանը հնչեցին Բակունցի սիրված ստեղծագործություններից:
Մեզ հետ զրույցում ժամանակին ջազմենի հետ համագործակցած եւ ընդհանրապես մտերիմ ընկերները, այդ թվում՝ Լեւոն Մալխասյանը, Երվանդ Երզնկյանը, Վազգեն Ասատրյանը, Ակսել Բակունցի մասին նախ արտահայտվում էին ներկա ժամանակով, իսկ հետո ոչ միայն ներկայացնում նրան իբրեւ բարձրարվեստ երաժշտի, այլեւ հիանալի մարդու:
Քոլեջի դասախոսական կազմը:
ՍԱՄՎԵԼ ԴԱՆԻԵԼՅԱՆ
«Առավոտ»
25.11.2016
