Սիրիայի իշխանությունները խոստովանել են, որ Պալմիրա (Թադմուր) քաղաքն անցել է «Իսլամական պետություն» ահաբեկչական խմբավորման վերահսկողության տակ, հաղորդում է BBC-ն: Ասադի կառավարությունը խոստացել է անել հնարավորինս ամեն բան՝ ջիհադիստներին այնտեղից դուրս մղելու համար:
«Բանակն օգտագործում է հնարավոր բոլոր միջոցները՝ քաղաքում զինյալների ամրապնդվելը կանխելու համար»,- հայտարարել է Հոմսի նահանգապետ Թալալ Բարազին:
Նա նշել է, որ զինյալներին հաջողվել է վերահսկողություն սահմանել քաղաքի վրա՝ շնորհիվ Ռաքքայից և Դեյր էլ-Զորից ուղարկված համալրման: Նահանջելուց առաջ կառավարական ուժերին հաջողվել է տարհանել բնակչության 80 տոկոսին:
Պալմիրայի վրա հարձակումը սկսվել էր շաբաթ օրը, դրան մասնակցում էր շուրջ 4000 զինյալ:
Կարդացեք նաև
Իսլամական պետության ահաբեկիչներն առաջին անգամ Պալմիրան գրավել էին 2015թ. մայիսին: Նրանք ավերել էին մեծ թվով հուշարձաններ, գլխատել հնագիտական թանգարանի տնօրենին, երբ վերջինս փորձել էր փրկել մշակութային արժեքները: 10 ամիս անց՝ 2016թ. մարտին քաղաքն ազատագրվել էր սիրիական զինված ուժերի կողմից:
Պատրաստեց՝ Վիկտորյա ԱՆԴՐԵԱՍՅԱՆԸ
