Այս գիշեր ԱՄՆ Կալիֆորնիա նահանգի Սանտա Մոնիկա քաղաքում անցկացվել է ԱՄՆ-ի և Կանադայի կինոքննադատների մրցանակաբաշխության արարողությունը, որում գլխավոր մրցանակները ստացել են դերասանուհի Նատալի Պորտմանը և դերասան Քեյսի Աֆլեքը, հաղորդում է The Hollywood Reporter-ը:
Այսպես, Պորտմանը մրցանակ է ստացել Պաբլո Լարինի «Ջեքի» ֆիլմում մարմնավորած դերի համար: Լավագույն դերասանուհու անվանակարգում նրա հետ մրցակցում էին Էմմի Ադամսը («Ժամանում»), Ռութ Նեգգան («Սիրել»), Իզաբել Յուփփերը («Նա»), Էմմա Սթոունը («Լա-լա-լենդ») և Աննեթ Բենինգը («20-րդ դարի կանայք»):
Տղամարդու լավագույն դերի համար մրցանակ է ստացել Քեյսի Աֆլեքը «Մանչեսթեր՝ ծովի ափին» ֆիլմի համար: Նույն անվանակարգում ներկայացված էին նաև Էնդրյու Հարֆիլդը («Խղճի նկատառումներով»), Դենսել Վաշինգտոնը («Ցանկապատ»), Ջոէլ Էդգերտոնը («Սիրել»), Թոմ Հենքսը (Հրաշք Գուձոնի վրա), Ռայան Գոսլինգը («Լա-լա-լենդ»):
«Լավագույն ֆիլմ» անվանակարգում հաղթել է ամերիկացի ռեժիսոր Դեմիեն Շազելի «Լա-լա-լենդ» մյուզիքլը: 31-ամյա Շազելը մրցանակը ստանալիս ասել է, որ «քանի որ իր ֆիլմը սիրո մասին է, ինքն առաջին հերթին շնորհակալություն է հայտնում իր սիրելիին»:
Շազելի համար «Լա-լա-լենդը» 3-րդ ռեժիսորական աշխատանքն է. նա նաև հայտնի է 2014թ. նկարահանած իր «Մոլեգնություն» (Whiplash) ֆիլմով:
«Լավագույն երգիծական ֆիլմ անվանակարգում հաղթել է Ռայան Ռեյնոլդսի մասնակցությամբ «Դեդփուլ» ֆիլմը, իսկ «էքշըն» ժանրում լավագույն ֆիլմ է ճանաչվել Մել Գիբսոնի «Խղճի նկատառումներով» ֆիլմը, իսկ լավագույն անիմացիոն ֆիլմ՝ Zootopia մուլտֆիլմը:
Սարսափ ոճի ժանրում կինոքննադատները մրցանակը շնորհել են «Ժամանում» ֆիլմին, իսկ լավագույն օտարալեզու ֆիլմ է ճանաչվել ֆրանսիական «Նա» դրաման:
Նյու Յորքի կինոքննադատների հանրությունը հիմնադրվել է 1935թ.: Դրա մեջ մտնում են տեղի ամսագրերի, թերթերի և առցանց պորտալների 300 կինոքննադատները: Ամեն տարի դեկտեմբերին նրանք քվեարկության ճանապարհով ընտրում են անցնող տարվա լավագույն կինոնախագծերը: Այս մրցանակաբաշխությունը, համարում են, որ հստակեցնում է կինոաշխարհում տիրող տրամադրությունները «Օսկար» մրցանակաբաշխությունից առաջ:
Պատրաստեց՝ Վիկտորյա ԱՆԴՐԵԱՍՅԱՆԸ
