Հանուն Բելառուսի անկախության կարելի է ապրել և առանց ռուսական նավթի, չնայած որ դժվար կլինի: Այս մասին, ինչպես հաղորդում է բելառուսական naviny.by պորտալը, այսօր տեղի ունեցած մամուլի ասուլիսում հայտարարել է Բելառուսի նախագահ Ալեքսանդր Լուկաշենկոն:
«Առանց ռուսական նավթի էլ կդիմանանք, չնայած որ դժվար կլինի,- ասել է Լուկաշենկոն:- Յարոսլավը (տնտեսագետ՝ Յարոսլավ Ռոմանչուկ-խմբ.) միանգամից կասի, որ դա շահավետ չէ, արդյունավետ չէ: Բայց անկախությունն ու ազատությունը շատ շահավետ են և չեն հաշվվում ո՛չ մի գումարով և ո՛չ մի թվով: Եթե մի նժարին անկախությունն է, մյուսին՝ ռուսական, իրանական, ադրբեջանական կամ ամերիկյան նավթը, դա համատեղելի չէ: Մենք, ամեն դեպքում, ելք կգտնենք»,- ասել է նա՝ հավելելով, որ դա, «ցավոք, Ռուսաստանում չեն հասկանում՝ մտածելով, որ բելառուսները ոչ մի տեղ չեն փախչի:
Ավելի վաղ Լուկաշենկոն հայտարարել էր, որ Բելառուսն իրավունք ունի ցածր գներով ռուսական գազ ստանալ՝ կապված նավթի գների անկման հետ:
Լուկաշենկոն նաև նշել է, որ Ռուսաստանի ու Բելառուսի միջև վերջին շրջանում լարվածության պատճառը Մոսկվայի մտավախությունն է առ այն, որ Մինսկը կշրջվի դեպի Արևմուտք:
Կարդացեք նաև
Լուկաշենկոյի կարծիքով՝ Ռուսաստանի ղեկավարության մեջ կան մարդիկ, որոնց դիրքորոշումը Բելառուսի նկատմամբ տարբերվում է այդ երկրի նախագահ Վլադիմիր Պուտինի դիրքորոշումից: «Վերջին շրջանում իրավիճակն այնքան էլ լավ չի զարգանում: Բայց ևս մեկ անգամ ընդգծում եմ. այնտեղ ուժերը տարբեր են»,- ասել է նա:
Բելառուսի նախագահը նաև քննադատել է Ռուսաստանին այն բանի համար, որ Անվտանգության դաշնային բյուրոն որոշել է վերականգնել Բելառուսի հետ սահմանային գոտին: Պաշտոնական Մոսկվան ավելի վաղ հայտարարել էր, որ վերահսկողությունը սահմանվում է երրորդ երկրների քաղաքացիների համար և որևէ կերպ չի անդրադառնա ռուսների և բելառուսների տեղաշարժի վրա:
Անդրադառնալով ԵԱՏՄ-ից Բելառուսի դուրս գալու վերաբերյալ վերջին օրերին տարածված լուրերին՝ Լուկաշենկոն դա որակել է որպես «լիակատար հորինվածք»: Այնուամենայնիվ, նա նշել է, որ ԵԱՏՄ տարածքում անհավասարության պատճառով Բելառուսը կորցրել է 15 մլրդ դոլար:
«Այս ընթացքում անհավասար գների, անհավասար պայմանների հետևանքով Բելառուսը կորցրել է 15 մլրդ դոլար: Նրանք ընդունում են այդ թիվը: Եվ հիմա մեզ տվել են 5 մլրդ դոլարի վարկ: Լավ է, էլի, գների միջոցով վերցնել մեզնից 15 մլրդ, հետո մեզ տալ մեր իսկ գումարները, այն էլ միայն մեկ երրորդ մասը»,- ասել է նա:
Պատրաստեց՝ Վիկտորյա ԱՆԴՐԵԱՍՅԱՆԸ
