Ինչպես տեղեկացրել ենք, այսօր 5-րդ գումարման ԱԺ-ի 11-րդ նստաշրջանի առաջին քառօրյա նիստն է:
Ժառանգության պատգամավոր Զարուհի Փոստանջյանը դիմեց ԱԺ նախագահ Գալուստ Սահակյանին եւ առաջարկեց Թուրքիայի խորհրդարանի պատգամավոր Կարո Փալյանին հրավիրել ԱԺ, որ ուղերձով հանդես գա. «Այդ պաշտոնական հրավերը դուք պետք է անեք: Խնդրում եմ պարզաբանեք՝ դուք պատրաստվո՞ւմ եք պաշտոնական հրավերով հրավիրել»: Նա ասաց, որ Փալյանը Թուրքիայի խորհրդարանում ուղերձով է հանդես գալիս եւ ճնշումների է ենթարկվում:
Գալուստ Սահակյանն ասաց, որ միտքը շատ լավն է, ընդունելի է բոլորի կողմից, բայց քաղաքական խնդիր կա այստեղ. «Պետք է վերլուծենք, տեսնենք՝ արդյոք ձեռ տալի՞ս է նրա այցը Հայաստան»:
Զարուհի Փոստանջյանը համաձայնեց՝ իսկապես հրավերն ունի քաղաքական նպատակ եւ հենց այդ նպատակից ելնելով էլ պետք է մենք մեր համերաշխությունը հայտնենք Փալյանին. «Մենք խնդիր ունենք քաղաքական համատեքստում հետապնդել եւ պաշտպանել մեր իրավունքները, այդ թվում` պաշտպանել նաեւ Կարո Փալյանի իրավունքը»:
Կարդացեք նաև
Հռիփսիմե ՋԵԲԵՋՅԱՆ
