Այսօր ԱԺ-կառավարություն հարցուպատասխանի ժամանակ ՀԱԿ խմբակցության ղեկավար Լեւոն Զուրաբյանը վարչապետ Կարեն Կարապետյանին ասաց, որ տեղյակ է՝ նա հանդիպել է ԵՄ պատվիրակության մշտական ներկայացուցիչ Պյոտր Սվիտալսկու հետ: Տարածված մամուլի հաղորդագրության մեջ էլ նշված է, որ խոսել են կոռուպցիայի դեմ պայքարի մասին, ասվել է, որ աշխատանքներ են տարվում կոռուպցիոն հանցագործությունների քննության որակի հետ կապված:
Լեւոն Զուրաբյանն ասաց, որ սրանք ընդամենը բառեր են: Նա իրականության մեջ մի օրինակ բերեց՝ Միհրան Պողոսյանի՝ Քեթրինի Միհրանի հետ կապված. «2013-ին ես այդ հարցը բարձրացրեցի, որ ԴԱՀԿ-ն «Քեթրին գրուպից» մեծ քանակով չինական մեքենաներ էր գնել, այսինքն՝ ինքն իրենից գնել էր: Հետո դրան հետեւեց Պանամական սկանդալը, որ նա հանդիսանում է օֆշորային ընկերությունների տեր եւ շվեյցարական բանկում հաշվեհամար էր բացվել, որի համար իրավասու միակ անձը Միհրան Պողոսյանն էր»;
Նա ասաց, որ երբ հարցը բարձրացրեց ԱԺ-ում, կառավարությունից պատասխանել են գրավոր, որ նա ազատվել է ԴԱՀԿ ծառայության պետի պաշտոնից, բացի այդ, ոստիկանությունում այդ հարցի վերաբերյալ նյութեր են նախապատրաստվել եւ ընթանում է քննություն: Հետո պարզվեց, որ նրա գործը կարճվել է: Զուրաբյանը հարցրեց՝ ինչպե՞ս եք դուք այսպես գնում ընտրությունների, դեռ նրան էլ ընդգրկում եք ձեր ցուցակի մեջ:
Հարցին պատասխանեց ոչ թե վարչապետը, այլ՝ արդարադատության նախարար Արփինե Հովհաննիսյանը: Նա էլ քաղաքական մասը բաց թողնելով՝ խոսեց իրավական խնդիրների, հաշվետվության թափանցիկության մասին եւ ոչ մի խոսք չասաց Միհրան Պողոսյանից:
Կարդացեք նաև
Լեւոն Զուրաբյանը հիշեցրեց, որ Միհրան Պողոսյանի գործը կարճել են այն հիմքով, թե Շվեյցարիայի իշխանությունները չեն բավարարել ՀՀ իրավապահ մարմինների միջնորդությունը, մինչդեռ Շվեյցարիայից «Հետքին» պարզաբանել են, որ միջնորդությունը ձեւակերպված չի եղել պատշաճ, դրա համար չեն բավարարել. «Սա նշանակում է, որ գործ ունենք կոռուպցիոն գործարքի հետ»:
Նա Թրանսփարենսի ինթերնեյշընըլին հղում արեց, որ կոռուպցիայի ընկալման համաթվով Հայաստանը նահանջել է՝ մոտենալով Ադրբեջանին:
Արփինե Հովհաննիսյանը պատասխանեց, որ կարող է չհամաձայնել ինչպես Զուրաբյանի, այնպես էլ Թրանսփարենսի ինթերնեյշընըլի հետ: Նա ասաց, որ նախընտրական բնույթի հայտարարություն է անում Զուրաբյանը. «Երբ ցիտում եք Թրանսփարենսի ինթերնեյշընըլին` հորդորս է` մինչեւ վերջ ցիտեք: Շարունակությունն այն է, որ այդ նահանջը պայմանավորված է ոչ այնքան նրանով, որ խոսքը վերաբերում է կոռուպցիայի դեմ գործողությունների եւ դրանք անարդյունավետությանը, այլ այդ սանդղակում ընգրկված երկրներն են իրենց տեղերը բարելավել: Բովանդակային առումով տարբերություն բացասական տեսանկյունից չկա»:
Հռիփսիմե ՋԵԲԵՋՅԱՆ
