ՀՀԿ խմբակցության պատգամավոր Շիրակ Թորոսյանն այսօր ԱԺ-կառավարություն հարցուպատասխանի ժամանակ վարչապետ Կարեն Կարապետյանին հարցրեց ջավախահայության խնդիրներից:
Նա հիշեցրեց, որ վարչապետի գլխավորած պատվիրակությունը օրերս Վրաստանում էր եւ տեսան, թե ինչ ջերմ վերաբերմունք են ունեցել Վրաստանում մեր պատվիրակության նկատմամբ: Պատգամավորը հետաքրքրվեց, թե կոնկրետ ջավախահայության հիմնախնդրի հետ կապված ինչ արդյունքներ ունեցան բանակցությունները:
Շիրակ Թորոսյանը նշեց, որ հայոց լեզվի դասաժամերի քանակն ավելացնելու ուղղությամբ խնդիրներ կան, հայոց լեզվի դասագրքերի մատակարարման խնդիրը, հայ-վրացական սահմանակետում Հայաստանից տպագիր մամուլի անցման հիմնախնդիրները եւ հարցրեց, թե ինչ ձեռքբերումներ կան այս առումով:
Կարեն Կարապետյանը պատասխանեց, որ իրականում եղել է շատ առարկայական հանդիպում, քննարկումներ. «Քննարկել ենք բոլոր հարցերը, որոնք հուզում են երկու կողմերին: Որեւէ հարցի հետ կապված չունենք խոչընդոտ, ավելին՝ ձեւակերպել ենք նոր մի մոտեցում, որ արտաքին աշխարհի առջեւ հանդես գանք միասնական շուկայով, առաջարկել ենք օգտագործել Հայաստանի հարթակը՝ վրացական կապիտալի եւ բիզնեսի համար՝ Իրան գնալու, մասնավորապես՝ մեր ազատ տնտեսական գոտին, ԵԱՏՄ-ն, խոսել ենք փորձի փոխանակման մասին: Չենք թաքցրել, որ մենք զբոսաշրջության իրենց փորձն ուսումնասիրելու հետաքրքրություն ունենք, իրենք չեն թաքցրել, որ ուզում են մեր IT-ն օգտագործել»:
Կարդացեք նաև
Ինչ վերաբերվում է ջավախահայության խնդիրներին, դրանք նույնպես քննարկել են եւ առաջիկայում ԿԳ նախարարը պետք է Վրաստան այցելի. «Որեւէ հարցի շուրջ մենք չունենք անհաղթահարելի հակասություններ, նույնիսկ այդ բառը ճիշտ չի օգտագործել, որովհետեւ մենք ընդհանրապես հակասություններ չունենք»:
Շիրակ Թորոսյանը հետաքրքրվեց՝ աբխազական երկաթուղու հարցը քննարկվե՞լ է՝ վարչապետը պատասխանեց, որ՝ ոչ: Այլընտրանքային տարբերակներ են քննարկվել եւ հավանական է համարում, որ լուծում կգտնեն, բանակցային փուլում են:
Հռիփսիմե ՋԵԲԵՋՅԱՆ
