«Մենք գտնվում ենք ոչ պատերազմ, ոչ խաղաղություն վիճակում: Ցանկացած ժամանակ սրացում հնարավոր է, քանի որ մենք տեսնում ենք, որ որևէ կերպ դիմացը չունենք վստահելի գործընկեր»,- «Նովոստի Արմենիա» մամուլի ակումբում, լրագրողների հետ հանդիպման ժամանակ պատասխանելով ղարաբաղաադրբեջանական եւ հայ-ադրբեջանական սահմաններում վերջին սրացումները կարո՞ղ են հերթական էսկալացիային բերել հարցին՝ ասաց ՀՀ ԱԺ պատգամավոր, «Եվրոպական Ինտեգրացիա» ՀԿ նախագահ Կարեն Բեքարյանը:
Այդ վտանգն, ըստ նրա, կա, քանի դեռ հարցի քաղաքական կարգավորումը վերջնական համաձայնության չի հանգեցրել: Իսկ դա չի կարելի ակնկալել այնքան ժամանակ, քանի դեռ «Ադրբեջանի իշխող կլանն իր մաքսիմալիստական գծից որոշակի նահանջ չի կատարել, չի մտել կոնստրուկտիվ դաշտ»:
«Եթե Ադրբեջանը ցանկություն ունի ստատուս քվոն փոխելու, դրա հնարավոր տարբերակը Լեռնային Ղարաբաղի անկախության, ինքնորոշման ճանաչման էլեմենտն է»,-ասաց նա`հավելելով, որ սին են Ադրբեջանի այն պատրանքները, թե հնարավոր է սրացումների, անհանգստության որոշակի մարդկային կյանքերի, հումանիտար աղետների միջոցով ինչ-ինչ դիվիդենտներ քաղել՝ թե հայկական կողմերից, թե միջազգային հանրությունից: «Շատ հստակ էր, որ դա չի աշխատում և Հայաստանը դրան չի գնալու»,- ասաց Կարեն Բեքարյանը:
Այս համատեքստում, գնահատելով ՀՀ նախագահի բրյուսելյան այցը ե այն հստակեցումը, որ «երբ պահը գա ու սրացումները բերեն պատերազմի, Հայաստանը, որպես ԼՂ անվտանգության երաշխավոր, չի խորշելու օգտագործել իր ողջ զինանոցը», Կարեն Բեքարյանը շատ կարեւոր եւ էական հստակեցում է համարում։
Կարդացեք նաև
«Սա այն հստակեցումների ամբողջական փաթեթն էր, որին մենք ականատես եղանք ՀՀ նախագահի՝ Բրյուսել կատարած այցի ընթացքում»,- ասաց բանախոսը`հավելելով, որ նախագահի այս ուղերձը կարևոր էր ոչ միայն Հայաստանի եվրոպական գործընկերների, այլ նաեւ Ադրբեջանի եւ համանախագահողների համար:
Մանրամասները`տեսանյութում
Նելլի ԳՐԻԳՈՐՅԱՆ
