Երեկ կայացած ԿԸՀ արտահերթ նիստում քննարկման դրվեց «Իրազեկ քաղաքացիների միավորում» խորհրդատվական ՀԿ-ի դիմումը, որով առաջարկվում էր հանձնաժողովին պաշտոնական պարզաբանում տալ ԸՕ 68 հոդվածի 6-րդ մասի դրույթին: Ըստ դիմումատուի, վերոնշյալ հոդվածի երկրորդ պարբերությունում ավելորդ գրառում պարունակող քվեարկության ծրար ձեւակերպումը հստակ չէ եւ տարաբնույթ է ընկալվում: Մասնավորապես, այն կարող է ընկալվել թե որպես քվեարկության ծրարի վրա առկա գրառում, թե որպես քվեարկության ծրարի վրա կամ դրա մեջ պարունակվող այլ թղթի վրա կատարված գրառում: Այլ կերպ ասած՝ հստակ չէ, թե արդյոք, եթե քվեարկության ծրարում պարունակվում է թուղթ, բայց ոչ քվեաթերթիկ, որի վրա կա գրառում, ապա այդ գրառումը որակվո՞ւմ է որպես քվեարկության ծրարում պարունակող ավելորդ գրառում, թե ոչ: Դա տարաբնույթ մեկնաբանությունների տեղիք է տալիս եւ կարեւոր հանգամանք է քվեարկության գաղտնիության պահպանման եւ ընտրողների կողմից իրենց ինքնությունը որեւէ եղանակով բացահայտելու առումով:
Դիմումը մանրամասն քննարկելուց հետո ԿԸՀ նախագահ Տիգրան Մուկուչյանը կարեւորեց բարձրացված խնդրի կարեւորությունը, բայց միեւնույն ժամանակ նշեց, որ բարձրացված հարցադրումները պետք է օրենսդրական լուծումներ ստանային: Դիմումատուի դիրքորոշումից հետեւում է, որ, ըստ էության, առաջարկվում է պարզաբանման միջոցով ընդլայնել ընտրական օրենսգրքով սահմանված իրավական հիմքերի շրջանակն այն դեպքում, երբ այդ ցանկը սպառիչ է եւ հստակ:
Ելնելով վերոգրյալից, հանձնաժողովը փաստեց, որ դիմումատուն դիմում է ոչ թե պարզաբանման, այլ, ըստ էության, նոր օրենսդրական կարգավորման խնդրանքով, ինչը ԿԸՀ իրավասության շրջանակներից դուրս է: Հանձնաժողովն իրավասու չէ պարզաբանելու ԸՕ քննարկման առարկա դրույթները ներկայացված ձեւաչափի ներքո, քանի որ այդ պարագայում կփոփոխվի նշված դրույթների իմաստը, ինչը հակասում է իրավական ակտերի մասին օրենքի պահանջներին:
Աշոտ ՀԱԿՈԲՅԱՆ
