«Ծառուկյան» դաշինքի առաջնորդ Գագիկ Ծառուկյանի նախընտրական քարոզարշավը շարունակվում է Սյունիքի մարզում: Մեղրիում հանդիպման ժամանակ մեղրեցիներին Գագիկ Ծառուկյանը հորդորեց չընկճվել, չհուսահատվել, քանի որ բոլոր խնդիրները լուծում ունեն: «Հույսով, հավատով, դուխով»,- ասաց Գագիկ Ծառուկյանը, հորդորելով ապրիլի 2-ին ձայն տալ այն քաղաքական ուժին, որին վստահում են:
Այստեղ Գագիկ Ծառուկյանը խոսեց իրենց եվրոպացի գործընկերների մասին, որոնք ողջունել են դաշինքի առաջարկած 15 կետերը, ասել են, որ դրանք միանգամայն իրատեսական են:
Գագիկ Ծառուկյանը նաեւ տնտեսական հաշվարկ արեց. ըստ նրա՝ եթե 50 մլն դոլար ներդրվի յուրաքանչյուր մարզում, 1 մլրդ դոլար էլ մեծ քաղաքներում, ապա կարելի է աշխատատեղերի հարց լուծել ողջ հանրապետությունում, ոչ թե ժողովրդին մուրացկանության մղել:
Կարդացեք նաև
Խոսելով տեղական բնույթի խնդիրների մասին, Գագիկ Ծառուկյանն ասաց, որ Քաջարանի պղնձամոլիբդենային կոմբինատը գերշահույթով է աշխատում, համապատասխան օրենսդրությամբ պետք է կարգավորել, որ սեփականատիրոջ շահույթը չգերազանցի 15%-ը: Ըստ Գագիկ Ծառուկյանի՝ կոմբինատն այժմ 35% շահույթ ունի, 20%-ը պետք է ներդնեն տարածաշրջանի զարգացման համար:
Մեղրիում նախընտրական իրավիճակը բավական հանդարտ է: Համենայնդեպս, մեզ հետ զրույցներում բնակիչներն ասում էին, որ նախընտրական լարվածություններ, «ռազբիրատներ եւ ռազբորկաներ» այստեղ չկան: Ի դեպ, Մեղրիում ամենաքիչ նամակները տվեցին Գագիկ Ծառուկյանին:
Մանրամասները քիչ ուշ, տեսանյութում:
Նելլի ԳՐԻԳՈՐՅԱՆ
