Ամերիկայի Միացյալ Նահանգների ամենահայտնի անկախ լրագրողներից մեկը համարվող Դավիթ Բարսամյանն այսօր Երեւանի գրադարաններից մեկում մեդիայի գործառույթների մասին դասախոսություն կարդաց:
Նրա խոսքով, մեդիա պրոպագանդան ու ԱՄՆ արտաքին քաղաքականությունն իրար հետ կապված են. «Մեդիան սիրում է ինքն իրեն ներկայացնել որպես օբյեկտիվ, հավասարակշռված, կողմնակալությունից ազատ, բայց իրականությունն այլ բան է ասում: Մեդիան գործում է որպես զանգվածային ոչնչացման զենք: Այն ամենը, ինչ ներկայացվում է որպես նորություն, երբեմն ծածուկ, երբեմն կոպիտ, պրոպագանդա է»:
Ըստ նրա, այնքան կենտրոնացում կա ոչ խորը լուրերի վրա, օրինակ՝ Քարդաշյանների ընտանիքի շուրջ լուրերը. «Ժամ առ ժամ պատմություններ են մեզ հասնում իրենց ամուսնությունների, բաժանումների, Հայաստան այցի, Մալիբուում գնումների մասին եւ այլն: Այս ամենը մեդիայի գործառույթների մաս է կազմում, մարդկանց ուշադրությունը կարեւոր բաներից շեղելու համար է, որ ուշադրություն չդարձնեն՝ ինչ է կատարվում ԱՄՆ-ի ներսում եւ աշխարհով մեկ»:
Արփինե ՍԻՄՈՆՅԱՆ