Ադրբեջանում անազատության մեջ գտնվող ռուս բլոգեր Ալեքսանդր Լապշինի գործով հերթական դատական նիստին այսօր լսել են երկու վկայություն: Մասնավորապես, Շուշիից հարկադիր տեղափոխված Էյուբ Աբդուլազիմովը հայտարարել է, որ Լապշինի մասին լսել է ԶԼՄ-ներից, հաղորդում է Turan գործակալությունը:
Նա վրդովմունք է հայտնել, որ «հայկական ագրեսիայի պատճառով ստիպված է եղել լքել հայրենիքը», հետևաբար Լեռնային Ղարաբաղն անվանելով «անկախ հայկական պետություն», Լապշինը «աջակցություն է հայտնել անջատողականներին»: Նա խնդրել է դատարանին Լապշինին արժանի պատիժ հասցնել:
Մյուս վկան՝ դարձյալ փախստական Ֆահրադդին Սաֆարովն ասել է, որ Լապշինն այցելելով Լեռնային Ղարաբաղ, վիրավորել է ադրբեջանցիների զգացմունքները:
Այնուհետև դատավոր Ալովսաթ Աբբասովը հայտարարել է, որ կլսեն ևս երեք վկաների, այդ թվում Լապշինի մոր վկայությունը: Սակայն Ադրբեջանի օրենքներով՝ վկան իրավունք ունի վկայություն չտալ մերձավորի դեմ:
Իր հերթին Լապշինի փաստաբան Էդուարդ Չերնինը հայտնել է, որ Լապշինի մայրը ցանկություն չունի վկայություն տալ դատարանում: Նա կգա Բաքու՝ որդու հետ տեսակցելու: Հաջորդ նիստը նշանակված է հուլիսի 6-ին:
Պատրաստեց Վիկտորյա ԱՆԴՐԵԱՍՅԱՆԸ
