Նորք-Մարաշում զինված խմբի գործով դատաքննության ժամանակ այսօր գործով ամբաստանյալ Վահան Շիրխանյանի պաշտպան Հայկ Ալումյանը հայտնեց՝ նախագահող դատավորին ինքնաբացարկի միջնորդություն ունի ներկայացնելու:
Միջնորդությունը պարոն Ալումյանը պայմանավորեց նախորդ դատական նիստում նախագահող դատավորի գործողություններով:
Հիշեցնենք, որ նախորդ դատական նիստին նախագահող դատավորը 3 ժամով Վահան Շիրխանյանին հեռացրեց նիստերի դահլիճից, քանի որ նա ներս մտնելիս ոտքի չէր կանգնել։
Պաշտպան Հայկ Ալումյանը նշեց, որ դատավորը դահլիճից դուրս Վահան Շիրխանյանի հասցեին անհարգալից և վիրավորական արտահայտություններ է հնչեցրել և փորձել է հաշիվ պահանջել։ Նա մեջբերեց Շիրխանյանի և դատավորի առանձնազրույցից մի հատված: Ըստ փաստաբանի՝ նախագահող դատավորը Շիրխանյանին ասել է. «Դու ով ես, որ ինձ ասես՝ չես հասկանում… Ձեր շինած երկիրն է, ինչ ես ուզում, դերասան, դու հիվանդ չես, նույնիսկ վազում ես»:
Պարոն Ալումյանն այսօր ինքնաբացարկի միջնորդությունը չներկայացրեց, որովհետեւ դատարանի որոշմամբ, նիստը հետաձգվեց ամբաստանյալ Արման Հայրապետյանի պաշտպանի բացակայության պատճառով: Նա գտնվում է հիվանդանոցում: Հաջորդ դատական նիստը նշանակվեց հուլիսի 14-ին:
Արփինե ՍԻՄՈՆՅԱՆ