Հեռուստատեսության եւ ռադիոյի ազգային հանձնաժողովի 2016-ի գործունեության մասին հաղորդումն է քննարկվում ԱԺ-ում, եւ «Ելքի» պատգամավոր Արտակ Զեյնալյանը ՀՌԱՀ նախագահ Գագիկ Բունիաթյանին հարցրեց՝ մոնիտորինգ կատարե՞լ եք պարզելու, թե որքա՞ն հարց են տալիս ընդդիմության ներկայացուցիչները ԱԺ-ում եւ լրատվության մեջ դա որքանով է արտացոլվում:
Արտակ Զեյնալյանը նաեւ հետաքրքրվեց՝ ընդունո՞ւմ եք, որ ՀՀ-ում կան կուսակցական կողմնորոշման հեռուստաալիքներ: Բունիաթյանը պատասխանեց, որ նախընտրական քարոզչության ժամանակ են հետեւում, դրանից դուրս չեն հետեւում եւ ոչ մի խախտում չեն արձանագրել մինչ օրս: Բունիաթյանն առաջարկեց, որ եթե ինչ-որ ԶԼՄ-ի հետ կապված բողոք ունի, կարող է դիմել, իրենց հանձնաժողովը կքննարկի:
Ինչ վերաբերում է կուսակցական հեռուստաալիքներին, Բունիաթյանը հայտարարեց. «Կուսակցական հեռուստաալիք չկա, եթե ինչ-որ մի հեռուստատեսություն իր դիրքորոշումներն ունի քաղաքական առումով, դա գրաքննության դաշտից է: Ես գտնում եմ, որ չկա, մենք նմանատիպ երեւույթ արտահայտված չունենք»:
Զեյնալյանն ասաց, որ Հեռուստատեսության եւ ռադիոյի մասին օրենսդրությունը շատ հին է, լրագրողական կազմակերպություններն առաջարկում են հիմնովին փոխել այն: Բունիաթյանը համաձայնեց եւ խոստացավ աջակցել:
ՀՀԿ պատգամավոր Ռուզաննա Մուրադյանը հորդորեց ուշադրություն դարձնել գովազդին: Ըստ նրա, գովազդի որակը, նպատակը պետք է բխի մեր երկրի ազգային ինքնության պահպանման, մեր քաղաքացիների դաստիարակչության շահերից:
Հռիփսիմե ՋԵԲԵՋՅԱՆ