Քիչ առաջ 2016թ. ոստիկանության ՊՊԾ գունդը գրաված «Սասնա ծռեր» զինված խմբի անդամներից 14-ի գործով դատական նիստը վերսկսվելուն պես դատավոր Արտուշ Գաբրիելյանը հերթական սանկցիան կիրառեց, այս անգամ՝ փաստաբան Հարություն Բաղդասարյանի հանդեպ՝ տեղից խոսելու եւ այդ կերպ դատարանի հանդեպ անհարգալից վերաբերմունք դրսեւորելու համար:
Սա կրկին հարուցեց ներկա փաստաբանների՝ Երվանդ Վարոսյանի, Արմինե Ֆանյանի, Ինեսսա Պետրոսյանի, Արա Ղարագյոզյանի, Դավիթ Գյուրջյանի, Տիգրան Հայրապետյանի, Արայիկ Պապիկյանի դժգոհությունը: Նրանք հայտարարեցին, որ հեռանում են նիստերի դահլիճից:
Չնայած դատավորի բղավոցներին՝ փաստաբանները դահլիճի ապակե պատնեշից այս կողմ գտնվող քաղաքացիների ծափերի ներքո լքեցին դատարանը:
Դատավոր Արտուշ Գաբրիելյանն արդեն 4-րդ անգամ ընդմիջեց նիստը՝ նշյալ փաստաբանների հանդեպ սանկցիայի որոշում կայացնելու նպատակով: «Սասնա ծռերի» հարազատներն ու համակիրները եւս լքեցին դատարանը:
Aravot.am-ի հետ զրույցում ամբաստանյալներից Արայիկ Խանդոյանի պաշտպան, փաստաբան Արա Ղարագյոզյանն ասաց, որ բոյկոտը պայմանավորված է դատավորի կողմից իրենց պաշտպանյալների եւ գործընկերների հանդեպ ապօրինի գործողություններով: «Սա խայտառակություն է եւ խեղկատակություն»,-ասաց փաստաբանը:
Թե ինչպիսին կլինեն փաստաբանների գործողությունները հաջորդ նիստում, Արա Ղարագյոզյանը նշեց, որ հարցը դեռ կքննարկեն:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
